Sesaun plenária Parlamentu Nasionál. Imajen/TATOLI

DILI, 04 fevereiru 2020 (TATOLI)—Parlamentu Nasionál (PN), aprova votu solidariedade ba vítima Virus Corona iha Repúblika Populár Xina (RPX).

Prezidente Parlamentu Nasionál Interina atuál Vise-Prezidente Parlamentu Nasionál, Maria Angelina Sarmento ne’ebé dirije meza, konsidera votu ne’e importante ba Estadu Xina.

Votu solidariedade hosi Parlamentu Nasionál ne’e aprovadu ho votu a-favór 52, kontra 0 no abstensaun 0.

Proponente Deputadu Partidu Demokrátiku, Mariano Assanami Sabino, hateten valór solidariedade ne’e valór importante ba iha prosesu kontrusaun nasaun Timor-Leste nian.

“Ita iha prosesu naruk ne’ebé ema barak fó solidariedade ba ita, apoia ita iha prosesu ukun-an iha situasaun defísil, liuliu ba Xina ne’ebé sai nasaun espesiál ba Timor-Leste, iha momentu difísil Xina maka haree no hateke ba dook ona Timor-Leste sei independente”, deklarasaun votu hosi Assanami liuhosi plenária Parlamentu Nasionál, tersa ne’e.

Assanami lembra, Xina nunka retira apoia ba Timor-Leste liuhosi Organizasaun Nasaun Unida (ONU) iha tempu difísil.

“Bainhira ukun-an embaixada dahuluk harii Timor-Leste maka Xina no to’o agora sira konsistente nafatin apoia ita”, Assanami argumenta.

Deputada PD, Elvina Sousa, hatutan votu solidariedade ne’e hanesan obrigasaun morál ba vítima Virus Corona iha Repúblika Populár Xina.

“Ita durante ne’e ita iha kooperasaun di’ak ho Xina, hanesan edukasaun, saúde no defeza. Tanba ne’e, votu ne’e ita expresa ita-nia solidariedade ba vítima sira. Ita laiha buat ida ajuda sira, maibé momentu ne’e ita ho orasaun ba sira”, dehan Deputada Elvina Sousa.

Entretantu, Deputadu Bankada Parlamentár FRETILIN, David Dias Ximenes ‘Mandati’, manifesta solidariedade ne’e nu’udar agradesimentu bainhira povu Timor iha terus no susar laran Xina sempre apoia povu Timor-Leste.

“Manifesta solidariedade ne’e nu’udar agradesimentu kuandu ita iha susar laran sira hatudu laran di’ak ba ita. Ita Timor iha neon hatene agradese ema, ita kuandu hatene agradese ema, ema hatene ita-nia an. Xina sempre iha ita-nia sorin bainhira ita tanis”, Deputadu Mandati informa.

Iha parte seluk, Parlamentu Nasionál aprova votu pezár ba James Dunn ne’ebé hakotu iis iha Austrália iha semana kotuk. Votu pezár ne’e aprovadu ho votu a-favór 53, kontra 0 no abstensau 0.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here