Labarik nain tolu halimar hela iha bero Leten iha Tasi ibun Bidau Santana, Dili 29 Marsu 2017. Labarik sira halimar hodi hein sira nia aman sira neebe ba buka ikan iha Tasi laran.Foto TATOLI

DILI, 4 fevereiru 2020 (TATOLI)–Xefe Gabinete Kontrolu Kualidade Hospitál Nasionál Guido Valadares (HNGV), Sara Maria Xavier hateten, labarik sira ne’ebé mak hetan má nutrisaun iha Hospitál Nasionál Guido Valadares ne’ebe baixa iha sala pediatria hamutuk na’in 10

“Sira na’in 10 ne’e husi fulan janeiru nian hahú husi tinan 12 mai kraik no la’os má nutrisaun grave maibé moderada. Labarik sira ne’e mai husi munisípu nomós inklui Dili,” dehan Xefe Gabinete Kontrolu Kualidade HNGV, Sara Maria Xavier, ba jornalista sira, segunda (3/2/2020).

Nia infroma, labarik hirak ne’e hetan nafatin atendimentu husi médiku sira no suporta nafatin nutrisaun ne’ebé sira presiza hodi bele hadi’a sira-nia saúde.

Labarik sira ne’ebé mak hetan má nutrisaun ne’e existe nafatin iha Ospitál Nasionál Guido Valadares no sira baixa iha sala pediátria nian.

Nia haktuir, problema ne’e kontinua akontese tanba menus koñesimentu husi populasaun sira liu-liu inan-aman sira oinsá atu oferese no prepara aihan ne’ebé mak di’ak ba oan sira bele kauza ba akontese má nutrisaun.

Kondisaun ne’e, nia esplika, akontese mós ba bebé sira ne’ebé mak foin moris presiza no efetivu fó inan nia susu-been durante fulan neen to’o kontinua tinan rua maibé dalaruma la hetan aihan sira ne’e bele akontese má nutrisaun.

Inportante, nia dehan, pesoál saúde sira tenke fó nafatin informasaun ka sensibilizasaun ba komunidade sira oinsá atu prevene má nutrisaun iha komunidade nia leet liu-liu ba labarik sira.

“Katak, labarik sira ne’ebé foin moris mai presiza hetan susu-been inan nian ho adekuadu durante fulan neen tomak depois kontinua too tinan rua, depois aumenta aihan supersiál sira seluk,” nia esplika.

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here