Janio Tilman (klaran). Imajen Tatoli/Hortençio Sanchez

DILI, 04 fevereiru 2020 (TATOLI)–Reprezentante ekipa tékniku ne’ebé halo preparasaun ba kongresu dahuluk Liga Futeból Amadora (LFA), Janio Tilman hateten kongresu sei realiza iha 21 marsu mai ne’e iha Timor Plaza, Dili, ohin.

“Prosesu tomak atu hakat ba kongresu foin lalais ne’e harii ekipa no estabelese ona estrutura ida hodi hala’o preparasaun hahú hosi 1 fevereiru to’o 21 marsu hala’o kongresu. Preparasaun ne’ebé ekipa ne’e halo maka sei prepara relatóriu sira hotu atu aprezenta iha kongresu no seluk tan,” Janio dehan liu hosi konferénsia imprensa ne’ebé hala’o iha salaun Xanana Sport Center, Bairro Formosa, Dili, tersa ne’e.

Tanba ne’e, nia tenik, aban bá-oin klube hotu ne’ebé hamahan-an iha LFA iha direitu tomak atu aprezenta lista kandidatura nune’e bele kompete iha kongresu.

“Kongresu nakloke ba ema sé de’it bele mai kandidata-an inklui mós fundadór sira. Tuir totál ne’ebé ami haree fundadór totál ema 20 bazeia ba estatuta. Klube 23 ne’ebé partisipa iha LFA iha direitu maka’as. Hahú aban ami sei haruka karta formál ba fundadór no klube sira hotu para hahú 5 fevereiru to’o 16 marsu bele aprezenta kandidatura nune’e bele kompete iha kongresu ne’e,” nia haklaken.

Nia subliña, kritéria atu hatene kle’an liu kongresista sira tenke hakbesik-an ba ekipa verifikasaun kongresu nian atu hetan informasaun ne’ebé klaru.

“Sita ona iha estatuta katak kongresu fó liu oportunidade ba parte sira ne’ebé partisipa ona iha Liga. Maibé, ida-ne’e hanesan kongresu dahuluk sei iha oportunidade atu diskute entre fundadór sira atu haree iha estatuta ne’e bele altera ka loke luan liután espasu ne’e atu ema hotu bele hetan oportunidade atubele kandidata-an,” Janio informa.

Entretantu, iha kongresu ne’e apoiante sira tenke aprezenta nia kandidatu. Komisaun prepara ona dokumentu atu fó apoiu ba Prezidente Ezekutivu nune’e bele tama iha pakote ida. Dokumentu haat ekipa prepara prontu ona.

“Ba kandidatu sira mínimu nia apoiante tenke ema na’in-lima maka aprezenta kandidatu ida,” nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here