Sekretáriu Estadu Protesaun Sivíl, Alexandrino Xavier Araújo. Imajen/Nelson de Sousa

DILI, 04 fevereiru 2020 (TATOLI)—Sekretáriu Estadu Protesaun Sivíl, Alexandrino Xavier Araújo fó-sai katak vítima dezastre naturál hahú hosi 2018, 2019 no 2020 hamutuk 7457.

Hosi família 7457 ne’e, Governu liuhosi Sekretaria Estadu Protesaun Sivíl responde ona 3698 la inklui Rejiaun Administrativa Espesiál Oé-Cusse Ambeno (RAEOA).

“Dadus pendente ne’ebé atu responde iha 2020 hamutuk 3759, maibé ne’e atu aumenta tan dadus dezastre balun. Governu halo ona distribuisaun ba 2018 hanesan apoia rekonstrusaun ba iha dadus hamutuk xefe família 1881 iha munisípiu ualu”, nia dehan bainhira hala’o debate urjénsia kona-ba inundasaun, iha plenária Parlamentu Nasionál, tersa ne’e.

Munisípiu ualu (8) ne’e maka hanesan Baucau, Viqueque, Manatuto, Aileu, Ainaro, Manufahi, Covalima no Liquiçá.

Nia hatutan, distribuisaun faze daruak ba vítima dezastre naturál tinan 2018 nian hamutuk xefe família 1100 iha munisípiu haat (4) hanesan Lautém, Dili, Ermera no Bobonaro.

Nia esplika, hosi situasaun hirak-ne’e hotu to’o iha 29 dezembru 2019 no mós 23 no 24 janeiru 2020 iha Dili aumenta tan dadus, tanba dadus 2018 nian hosi Ataúro nian ne’ebé falla (seidauk responde) hamutuk ho dadus 2017 nian ne’ebé seidauk responde tanba hosi Governu koopera ho Ministériu Administrasaun Estatál.

Nune’e, dadus sira-ne’e liuhosi dalan ida de’it tanba presiza serbisu hamutuk ho Ministériu Administrasaun Estatál (MAE) liuhosi xefe aldeia, xefe suku no xefe postu sira.

“Totál pendente ne’ebé mak atu responde iha tinan 2020 ne’ebé mak ho totál xefe família 3759, ida-ne’e seidauk inklui previzaun dadus tinan 2020 hosi munisípiu ne’ebé seidauk tama”, Alexandre haktuir.

Maibé, parte Governu liuhosi Sekretaria Estadu Protesaun Sivíl esforsu maka’as no kontaktu pontu fokál hosi munisípiu sira atubele atualiza nafatin dadus sira ne’ebé mak iha nune’e bele hetan apoia emerjénsia hosi Governu.

Apoia emerjénsia Governu iha tipu rua. Tipu ida ba emerjénsia no tipu ida seluk ba rekonstrusaun ba sira-nia uma. Tipu ida ba emerjénsia ne’e iha momentu ne’ebé mak situasaun akontese, Governu tenkeser hola kedas dadus emerjénsia ida para bele fó apoia no tipu ida rekonstrusaun ne’e sei halo fali levantamentu foun.

Purtantu, Governu uza kritéria tolu (3) ba apoia emerjénsia, hanesan kategoria aat totál, kategoria aat natoon no kategora aat kamaan.

Nia fó ezemplu, Governu uza tipu rua ne’e tanba dadus balun Governu presiza halo re-verifika tanba kazu iha 2 outubru 2019 iha Ermera nian, ne’ebé mak dadus sai liu rihun-ida para hetan apoia rekuperasaun no emerjénsia, maibé Governu re-verifika fali tun ba rihun-hitu resin.

“Ida-ne’e mak halo atrazu maibé hosi parte Governu preparadu atubele kontinua fó apoiu”, nia katak.

Ema Mate 28 no Kanek 24

Sekretáriu Estadu Protesaun Sivíl ne’e mós hato’o katak vítima dezastre naturál iha 2019 no 2020 ema kanek hamutuk 24, mate 28.

Vítima dezastre naturál hosi munisípiu Aileu ahi-han 1, Bobonaro mós ahi-han ida (1), Baucau iha inundasaun mate ida, Dili rai halai mate ida no foin daudaun inundasaun hamate ema ida (1) no ahi-han ró rezulta ema ida (1) mate, Ermera anin-boot hakanek ema na’in-10 no mate tolu (3).

Entretantu, Liquiçá iha konflitu iha Bazartete nian mate rua (2), kanek tolu (3) no joven mout iha Ulmera mate rua (2), Manatuto inundasaun mate na’in-haat (4) no karreta baku-fila rezulta ema ida (1) mate, Manufahi mate rua (2), Viqueque mate lima (5).

“Maizumenus iha 2019 no 2020 mate 28 no kanek 24”, Sekretáriu Estadu Protesaun Sivíl, Alexandrino de Araújo tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here