Reprezentante Organizasaun Nasaun Unida (ONU) iha Timor-Leste, Roy Trivedy (liman loos). Imajen Tatoli/Julia Chatarina

DILI, 03 fevereiru 2020 (TATOLI)–Reprezentante Organizasaun Nasaun Unida (ONU) iha Timor-Leste, Roy Trivedy ho ninia ekipa hasoru-malu ho Primeiru-Ministru (PM), Taur Matan Ruak, hodi ko’alia kona-ba oinsá bele koopera hamutuk hodi kontrola Virus Corona ne’ebé daudaun ne’e espalla iha provínsia Wuhan iha Xina.

“Ohin ami mai hasoru Primeiru-Ministru atu ko’alia kona-ba Virus Corona ne’ebé daudaun ne’e da’et ba iha Xina no iha mundu. Ami hato’o ba Primeiru-Ministru katak ONU prontu serbisu ho Governu atu kontrola virus ne’e,” Roy Trivedy ba mídia hafoin enkontru ho Xefe Governu iha Palásiu Governu, segunda ne’e.

Nia salienta, iha soru-mutuk ne’e sira hato’o mós ba PM Taur atu bele tau hamutuk rekursu ne’ebé bele presiza atu kontrola ba kazu Virus Corona.

“Ami mai hato’o mós ba Primeiru-Ministru kona-ba serbisu ne’ebé agora ami koordena daudaun hamutuk ho Governu Timor-Leste nian, liuhosi Ministériu Saúde atu haree oinsá tau hamutuk rekursu ne’ebé iha atu kontrola virus ne’e”, nia tenik.

Iha biban ida-ne’e, ekipa ne’e hato’o mós ba PM kona-ba informasaun ne’ebé la mai husi fonte kredível ba iha públiku, tanba oras ne’e daudaun mosu informasaun oioin ne’ebé la ajuda. Tanba ne’e, sira nia parte husu atu koordena didi’ak hodi bele atualiza informasaun kona-ba situasaun ho infomasaun ne’ebé maka loos.

“Agora daudaun ita haree katak iha insidente ida-ne’e ita fó resposta liuhosi Ministériu Saúde iha mundu tomak. Maibé, ita mós hatene katak bainhira buat ne’e ita identifika, nia la’ós kaer de’it ona kestaun ne’ebé maka ita tenke haree liuhosi kontribuisaun saúde nian no envolve mós seguransa imigrasaun, maibé ita tenke iha aprosimasaun ida-ne’ebé envolve la’ós Ministériu Saúde maibé Governu tomak, hamutuk ho parseiru sira atu responde ba kazu  Virus Corona”, nia dehan tan.

Nune’e mós, ONU serbisu nafatin ho Governu no mós embaixada sira atu haree bainhira virus ne’e to’o duni iha Timór, bele kontrola nune’e labele da’et ba ema seluk.

“Ami kontente tebes ho Primeiru-Ministru nia resposta ne’ebé hatudu katak nia informadu tebes ho kestaun ida-ne’e no nia hakarak husu pergunta barak kona-ba kazu virus ne’ebé oras ne’e la’o iha mundu, ne’ebé ema na’in hira maka moras to’o mate. Nia mós hatene katak Ministériu Saúde agora lidera hela nasaun nia resposta ba moras ida-ne’e, tantu iha Parlamentu Nasionál mós agora daudaun iha sesaun ne’ebé Governu informa ba reprezentante povu nian kona-ba situasaun atuál”, nia haktuir.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here