Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristovão

DILI, 03 fevereiru 2020 (TATOLI) – Ministru Negósiu Estranjeiru no Kooperasaun, Dionísio da Costa Babo Soares, hasoru malu ho Primeiru-Ministru (PM), Taur Matan Ruak, hodi atualiza informasaun kona-ba bolseiru timoroan na’in-17 ne’ebé izola-an iha sidade Wuhan, provínsia Hubei, ne’ebé sai sentru ba sirkulasaun Virus Corona.

Tuir Governante ne’e, Ministériu Negósiu Estranjeiru no Kooperasaun (MNEK) komunika ona país seluk ne’ebé besik sidade Wuhan hodi bele evakua bolseiru sira ba fatin ne’ebé seguru.

Ita iha kontaktu ho país balun sira ne’ebé disponível maibé tenke iha lai konkordánsia husi Governu Xina maka ita bele lori maluk sira ne’e sai. Agora maluk sira ne’ebé hela iha parte seluk husi Xina nian, ne’ebé la afetadu ba Virus Corona ita la ko’alia, ida ita ko’alia deit maka ita-nia estudante sira ne’ebé hela iha sidade Wuhan”, tenik Dionísio iha Palasiu Governu, segunda ne’e.

Notísia Relevante: Governu Xina Autoriza Evakua Bolseiru Timoroan iha Wuhan

Nia informa, daudaun ne’e bolseiru sira iha Wuhan preparadu hotu ona atu evakua no hein de’it kontaktu husi país viziñu sira, hafoin kontaktu Governu Xina tanba sira aprova ona atu bolseiru sira bele evakua.

Dionísio salienta, daudaun ne’e eskola sira iha Wuhan taka hotu, inklui edifísiu boot sira taka hotu no sidade ne’e sai mamuk tanba ema hotu izola-an.

Iha biban ida-ne’e, nia apela nafatin ba timoroan sira ne’ebé maka hela iha Xina no parte seluk husi Xina, tenke kuidadu no proteje-an.

“Hafoin timoroan ne’ebé ami rona katak balun mai husi Xina to’o mai ona maibé halai ba subar iha sira nia uma. Ami husu inan no aman sira favór ida tenke lori sira ba aprezenta-an iha Ministériu Saúde no ospitál sira hodi bele hela iha fatin izolamentu ka fatin observasaun nian tanba ida perigu tebes. Kuadu sira mai nonok de’it no ita la hatene sira nia moras iha ka laiha, hafoin da’et  ona ba ema barak ne’e labele”, nia akresenta.

Nune’e, nia husu parte hotu hodi bele koopera tanba iha parte imigrasaun mak sei haree.

“Di’ak liu bainhira mai husi Xina, iha loron 14 nia laran ba aprezenta-an ba Ministériu Saúde atu bele halo observasaun”, nia dehan tan.

 Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here