Ministru Negósiu Estranjeiru no Kooperasaun, Dionísio da Costa Babo Soares.Imajen Tatoli/Antonio Goncalves

DILI, 03 fevereiru 2020 (TATOLI) – Governu Timor-Leste iha ona medida prevensaun, relasiona ho Virus Corona ne’ebé daudaun ne’e sirkula iha sidade Wuhan, provínsia Hubei no sai ona preokupasaun ba populasaun iha país barak inklui Timor-Leste.

Ministru Negósiu Estranjeiru no Kooperasaun, Dionísio da Costa Babo Soares, hasoru malu ho Primeiru-Ministru (PM), Taur Matan Ruak, hodi ko’alia kona-ba koordenasaun serbisu interministeriál.

“Ko’alia kona-ba preparasaun ne’ebé Ministériu Negósiu Estranjeiru no Kooperasaun (MNEK) ho Minstériu Defeza no Seguransa, Ministériu Interiór no Ministériu Saúde, hodi haree posibilidade saida maka ita bele halo kuandu ita nia ema ruma hetan moras ne’e”, dehan Dionísio iha Palásiu Governu, segunda ne’e.

Nia subliña, Governu halo hela esforsu atu bele hasai bolseiru timoroan na’in-17 iha sidade Wuhan ba país seluk.

Tuir governante ne’e, medida ne’e hodi haree bainhira ema ida kona Virus Corona no nia tama Timór, esforsu saida mak parte relevante sira sei foti hodi rezolve.

Ministériu  Defeza no Seguransa liuhosi Diretór Jerál hasai tiha ona despaisu ida hodi haree ema ne’ebé mai husi rai-li’ur didi’ak karik sira iha sintóma ne’ebé maka hatudu katak sira sujeitu ba observasaun durante semana rua nia-laran no medida médika ne’ebé di’ak hodi bele tau kedas sira iha izolamentu.

Despaisu konjunta diriji ba Diresaun Jerál Servisu Migrasaun, atu bele presta servisu másimu no mós atu implementa hela medida prevensaun hodi halo kordenasaun hamutuk ho Organizasaun Mundial Saúde (WHO-sigla inglés) no envolve ministériu relevante sira seluk hodi halo prevensaun iha Terestre, Aeroportu no Portu Matitima sira.

Jornalista: Julia Chatarina

Editór: Xisto Freitas 

HAKEREK NO HATÁN

Please enter your comment!
Please enter your name here