Formandu Lian Jestuál Sei Estajiu Iha Instituisaun Públika Sira. Imajen: Felicidade Ximenes

DILI, 03 fevereiru (TATOLI)-Sekretariu Estadu Komunikasaun Sosiál (SEKOMS), Mericio “Akara” Juvinal dos Reis, ohin,  halo lansamentu ofisiál ba formandu membru Klibur Difisiénsia Tilun Timor-Leste  (KDTTL) ne’ebé ramata ona formasaun iha Lian Jestuál durante fulan tolu atu hala’o sira-nia estajiu iha instituisaun públika sira.

“Durante fulan tolu, ita-nia maluk difisiénsia tilun halo ona formasaun kona-ba lian jestuál. Sira-nia prosesu teória ramata ona no agora sira kontinua ba estajiu,” Sekretariu Estadu Komunikasaun Sosiál Mericio Juvinal Akara ba jornalista sira hafoin halao enseramentu ba atividade formasaun lian jestuál nian iha edifisiu KDTTL, Matadoru, ohin.

Nia hatutan, kompromisu Oitavu Governu Konstitusionál nian katak Governu iha responsabilidade tomak atu kontinua apoiu ba maluk difisiénsia tilun ne’ebé totál iha Timor-Leste iha ema rihun 200 resin ne’e la’ós númeru ne’ebé mak ki’ik

“Ida ne’e dever Governu nian atu kontinua apoiu sira para sira labele sees husi prosesu dezenvolvimentu iha ita-nia rain. Iha kontestu SEKOMS nia apoiu orsamentu uitoan ba atividade formasaun ida ne’e,” nia hateten.

Objetivu husi formasaun ne’e, nia esplika, bainhira partisipante sira hatene ona lian jestuál ida ne’e, sira bele ba serbisu iha media komunikasaun sosiál sira liu-liu Televizaun Timor-Leste (RTTL,ep) no media privadu sira para sira halo notísia nasionál karik iha mós lian jestuál.

Governante ne’e informa, sira mós konsege fó formasun ba ema na’in 10 ona ne’ebé mak prontu atu pratika lian jestuál. Tan ne’e, nia husu ba instituisaun sira liu-liu meius komunikasaun estadu nian katak hahú aproveita sira para halo lian jetuál hodi fasilita informasaun ba maluk difisiénsia tilun iha Timor laran tomak.

“Ha’u husu ona ba iha RTTL.EP inklui mós fó hanoin ba ita-nia media privadu sira, se bele tinan ne’e bele fasilita ita-nia maluk difisiénsia tilun para sira halo lian jestuál bainhira sira halo notísia. Tinan ida ne’e, RTTL koko fasilita lian jestuál teknikamente bele rezolve implementa,” nia dehan.

Tanba ne’e, Governante ne’e hato’o mensajen ba ba meius komunikasaun sosiál sira katak maluk difisiénsia tilun hala’o estajiu iha instituisaun públiku sira karik labele halo diskriminasaun. Maibé, tuir nia, tenke trata sira hanesan timoroan no sira iha direitu hanesan ho timoroan sira seluk.

“Ita fó oportunidade hanesan ba sira atu sira bele fasilita fali sira nia maluk defisiénsia tilun ema rihun 200 resin iha Timor-Leste ne’e atu sira mós bele akompaña informasaun saida de’it mak akontese iha ita-nia rain,” nia esplika.

Iha fatin hanesan, Diretór Exekutivu Asosiasaun Difisiénsia Timor-Leste, Cesario da Silva hateten, atividade ne’e atu husik formandu sira na’in 10 ne’ebé ramata ona formasaun atu ba estajiu iha instituisaun públika sira.

“Durante fulan tolu nia laran, formandu sira tuir ona formasaun lian jestuál hanesan teória no agora daudaun sira kontinua ba prátika nian liuhusi dalan estajiu,” nia hateten.

Nune’e, tuir nia, ohin hakat ba fulan haat atu ba estajiu husi sira na’in 10 ne’e mak nia parte konvida Sekretariu Estadu Komunikasaun Sosiál fó sai ona sira hanesan lansamentu ofisiál ida hahú sira-nia estajiu ho durasaun tempu durante fulan ida-nia laran.

“Formandu na’in 10 ne’e feto haat (4) no mane neen (6). Iha atividade ne’e, SEKOMS apoiu orsamentu hamutuk rihun $6 resin,” nia dehan.

Notísia relevante:Governu Konsulta Planu Asaun Nasionál ba Ema ho Defisiente

Jornalista : Felicidade ximenes

Editór         : Rafy Belo

HAKEREK NO HATÁN

Please enter your comment!
Please enter your name here