Diretór Nasionál Transporte Terrestre, Natalino do Rosário. Imajen Tatoli/Joanico de Araújo

DILI, 03 fevereiru 2020 (TATOLI) – Diresaun Nasionál Transporte Terrestre (DNTT) laiha ona karta kondusaun orijinál no karta libreti (STNK) atu emite ba motorista no kondutór sira.

“Ohin maka xefe departamentu karta kondusaun nian fó hatane ha’u katak libreti no blanku ba karta kondusaun orijinál laiha ona, tanba ne’e maka hahú ohin, ita kontinua fó fali karta kondusaun provizóriu ba ita-nian kliente, liuliu ba sira ne’ebé maka liu ona ezame ba lisensa kondusaun nian”, Diretór Nasionál Transporte Terrestre (DNTT), Natalino do Rosário, ba Ajénsia TATOLI iha Balidi, ohin.

Tanba ne’e, nia oriente ona ofisiál finansa hosi DNTT hodi haruka karta re-akizisaun ida ba Ministériu Transporte no Komunikasaun (MTK) atu haree hodi buka kompañia foun ba fornese libreti no karta kondusaun orijinál.

“Agora daudaun ofisiál finansa DNTT prepara hela karta re-akizisaun ba kompra libreti no blanku karta kondusaun nian, orsida bele haruka ona ba aprovizionamentu ministériu atubele halo prosesu ba sasán sira ne’e”, dehan.

Nia salienta maske daudaun Governu enfrenta hela situasaun polítika ne’ebé ladún estavel, maibé uza osan duodésimu ho montante $16.730 atu sosa libreti no xapa matrikula orijinál maizumenus rihun tolu.

Antes ne’e, Kompañia Gráfika Pátria Unipessoal, Lda, fornese blanku karta kondusaun orijinál hamutuk rihun 24-resin, maibé númeru ida ne’e la to’o ba kliente.

Entretantu iha 2018, DNTT la konsege sosa blanku ba karta kondusaun no xapa matríkula tanba impase polítika ne’ebé uza de’it orsamentu duodésimu, nune’e iha 2019 DNTT tau fali iha planu atu sosa.

Totál blanku ne’ebé maka diresaun propoin atu hola mak rihun 40, maibé tanba orsamentu ne’ebé aloka lato’o atu kobre. “Tanba ne’e ami só bele kompra 24.588 (mil dolár), nune’e mós ba xapa matríkula tinan ne’e ita tenke kompra maizumenus 30 mil e tal dólares, maibé tanba orsamentu lato’o kompra de’it iha 22 mil e tal”, Natalino do Rosário informa.

Jornalista : Natalino Costa
Editora : Maria Auxiliadora 

HAKEREK NO HATÁN

Please enter your comment!
Please enter your name here