Veteranu rezisténsia, Pascoal Ximenes Pereira “Nixon”. Imajen/Eugénio Pereira

DILI, 02 fevereiru 2020 (TATOLI)- Veteranu rezisténsia, Pascoal Ximenes Pereira “Nixon”,  Lourenço José Cabral “Aquito” ho Afonso Cabral, “Mate Mak Foti”, husu ba lider rejistensia sira ne’ebé mak ukun rai ida ne’e, hanesan Kayrala Xanana Gusmão, Taur Matan Ruak, ho Francisco Guterres “Lu Olo”, atu tuur hamutuk rezolve impase polítika ne’e ho dame malu.

Veteranu sira lakohi atu luta na’in sira ne’ebé ukun hela atu kontinua selok malu iha palku polítika hodi afeta ba estabilidade polítika, dezenvolvimentu nasionál ho ekonomia povu Timor-Leste nian.

Pascoal Ximenes Pereira “Nixon” dehan, nasaun harii husi sofrimentu, katak ema rihun nia terus no mate maka harii nasaun ne’e hetan independénsia tinan 20 ona, tanba ne’e, tempu atu lider sira tuur hamutuk rezolve problema ho dame.

Nia dehan, iha demokrasia Timor-Leste, lider rezisténsia sira ne’ebé agora ukun nasaun sira bele selok malu iha palku polítika, maibé sira tenke tau aas interese nasaun, hanesan unidade  nasionál ne’ebé lider sira hatudu iha funu naruk tinan 24 nunka fahe malu.

“Iha demokrasia no palku polítika  ne’e sira diferensa ideia ne’e normál, mais hanoin ba interese nasaun.  Ha’u fiar katak %100 katak problema ne’e sira maka halo, sira maka sei rezolve, tanba sira na’in tolu Maun Xanana,  Maun Taur no Maun Lú Olo inklui Jenerál Lere Anan Timur uluk ita hamutuk ho povu halo funu maka manan independénsia,” Nixon hateten ba Ajénsia TATOLI, ohin, hafoin partisipa serimónia aniversáriu transformasaun FALINTIL ba F-FDTL ba dala-19 (02 fevereiru 2001-2020) iha Kuartél Jenerál  F-FDTL, Fatuhada, Dili.

Nia husu ba lider nasionál sira tenke halo reflesaun para tau aas interese nasaun no povu hodi fó valór no fó ksolok ba eroi sira ne’ebé mate ona.

“Uluk katuas Xanana dehan ita funu bele mate mohu, maibé FALINTIL tenke hamriik ba oin, atu lori povu ba ukun aan, agora ha’u fiar maun na’in tolu bele rezolve krize polítika ida ne’e atu hatudu ba povu katak, unidade nia na’in mak imi, dame nia na’in maka imi, nasaun no povu, imi maka ukun ho domin sei  sai ho di’ak liu,” komandante Nixon hateten.

Nixon mós apela ba joven partidu polítiku sira labele aproveita atu fahe unidade lider sira nian iha situasaun agora, tanba papél joven atu sai riin ba demokrasia liu husi estuda makas atu prienxe no kontribui ba dezenvolvimentu Timor-Leste.

Komandante Aquito. Imajen/Eugénio Pereira

Veteranu Rezisténsia, Lourenço José Cabral “Aquito” dehan, impase polítika ida ne’e sei hetan solusaun di’ak,  no importante liu maka lider sira tuur hamutuk.

“Hanesan veteranu ida, ha’u husu atu maun boot sira hamutuk hodi kontribui ba diálogu nasionál ne’ebé Prezidente Repúblika halo para bele hetan solusaun pasifika,” tenik nia.

Iha fatin hanesan Veteranu Rezisténsia Rejiaun I, Afonso Cabral, “Mate Mak Foti” husu atu lider sira presiza unidade para bele kontribui ba nasaun Timor-Leste no povu nia moris di’ak.

“Úniku solusaun maka ita nia lider sira no ita nia maun sira  tenke tuur hamutuk mai hanoin ida de’it para lori Timor ba oin no sai husi konflitu hotu-hotu,” nia espera.

Iha fatin hanesan, Xefe Estadu Maiór Jenerál F-FDTL, Majór Jenerál Lere Anan Timur hateten, mezmu iha serimónia aniversáriu transformasaun FALINTIL ba F-FDTL ba dala-19, Maun Boot Kay Rala Xanana Gusmão no Taur Matan Ruak la partisipa, maibé Lere fiar katak, Prezidente Repúblika Francisco Guterres Lú  Olo, sei buka organiza lider polítiku atu hamutuk rezolve problema nasaun aas liu interese partidu polítiku nian.

“Apela ba vosa exelénsia atu kaer metin ba Konstituisaun hodi buka solusaun nasaun ida ne’ebé ho armonia no toleránsia hodi hatuur keta tiha diferensa pesoál ou ideolojia sira hodi serbí loloos povu Timor-Leste,” Lere hateten.

Komandante Lere dehan, F-FDTL no PNTL sei kontinua garante nafatin estabilidade iha rai laran hodi nasaun no povu moris nafatin iha ambiente dame.

Lere apela ba lider sira atu halo reflesaun, atu nune’e, bele asegura nafatin valór luta ne’ebé lider sira hanorin  hodi promove diálogu nasionál a hodi hetan konsensu nasionál no fó liman ba malu  hodi solusiona krize polítika ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here