Reprezentante Konfisaun Relijioza sira, Lourenço Dos Santos, dadalia ho jornalista sira hafoin hala'o enkontru ho Prezidente Repúblika, Francisco Guterres Lú Olo, Iha Palásiu Prezidente Nicolau Lobato, sesta (31/01/2020). Imajen Tatoli/ Egas Cristóvão

DILI, 31 janeiru 2020 (TATOLI)–Líder sira Konfisaun Relijioza kompostu husi Relijiaun Musulmana, Relijiaun Protestante no Budha iha Timor-Leste, fó konfiansa totál ba Xefe Estadu, Francisco Guterres Lú Olo, atu foti desizaun ba impase polítika rai-laran tuir konstituisaun. 

Aleinde ne’e, líder Konfisaun Relijioza sira mós husu atu halo diálogu nasionál entre líder rezisténsia sira.

Portavóz Konfisaun Relijioza, Pastór Lourenço dos Santos, hanesan moderadór Igreja Protestante Timor-Leste (IPTL) hato’o lia hirak-ne’e ba mídia, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

“Ami hato’o ami-nia opiniaun katak presiza halo diálogu nasionál. Promove diálogu nasionál husi fuan ba fuan, liuliu ba lideransa funu-na’in sira, atu kria unidade nasionál, fó liman ba malu, atu ultrapasa situasaun ne’e. Husu mós ba Prezidente Repúblika atu uza kompeténsia tuir Konstituisaun Repúblika Demokrátika Timor-Leste (K-RDTL), hodi bele foti desizsun ba situasaun atuál”, nia hateten.

Nune’e mós, pendeta Francisco dos Reis hateten katak problema ohin loron ne’e problema ki’ikoan liu, kompara ho krize sira antes, maibé konsege rezolve.

Tanba ne’e, nia husu ba líder sira atu tuur hamutuk, halo diagnosa ida profunda hodi hakotu lalais.

“Ami husu ba líder xave sira, liuliu líder rezisténsia sira atu tuur hamutuk halo diálogu, haluha tiha konflitu polítika, sei hetan lalais solusaun”, nia sujere.

Entretantu, Reprezentante Konfisaun Relijioza sira ne’ebé halo diálogu ho Prezidente Repúblika maka Pastór Lourenço dos Santos, hanesan moderadór Igreja Protestante Timor-Leste (IPTL), Pastór Francisco dos Reis, Prezidente Igreja Assembleia de Deus Timor-Leste, Prezidente Musulmanu Timor-Leste, Pascoal Sidik Lemorai, Boaventura da Silva, husi Konsellu Superiór Musulmanu Timor-Leste, no reprezentante relijiaun Budha iha Timor-Leste, Siu Peng Lay.

Tuir ajenda, Prezidente Repúblika sei halo diálogu ho Konsellu Kombatente Libertasaun Nasionál iha 3 fevereiru 2020.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here