Arsebispu Arkidioseze Metropolitana Dili, Don Virgílio do Carmo da Silva, SDB. Imajen/ Egas Cristóvão

DILI, 31 janeiru 2020 (TATOLI)–Conferência Episcopál Timorense (CET) rekomenda ba Xefe Estadu, Francisco Guterres Lú Olo, atu buka solusiona impase polítika rai-laran tuir lei-inan ne’ebé hakerek iha Konstituisaun Repúblika Demokrátika Timor-Leste (K-RDTL). 

Arsebispu Arkedioseze Metropolitana Dili, Don Virgílio do Carmo da Silva, SDB, hato’o lia hirak-ne’e ba mídia, hafoin hasoru-malu ho Prezidente Repúblika iha Palásiu Prezidente Nicolau Lobato,  Bairru Pité, Dili, ohin.

“Uma-Kreda rekomenda ba Prezidente Repúblika atu uza nia podér tomak, hodi buka solusaun ba problema ne’ebé ita enfrenta bazeia ba ita-nia lei inan, ne’ebé hatuur ona iha konstituisaun. Únika ita-nia konstituisaun maka sei garante atu ita bele la’o iha dalan ne’ebe loos. Ita-nia situasaun ne’ebé ita atravesa, ninia xave maka ita-nia lei-inan ka konstituisaun hodi inspira atu buka dalan di’ak ba povu ida-ne’e”, Don Virgílio haklaken.

Don Virgílio mós haktuir katak Uma-Kreda Timor-Leste apresia ho inisiativa ne’ebé Prezidente Repúblika foti, atu rona opiniaun husi parte hotu liuliu Uma-Kreda Katólika perante situasaun atuál.

“Dadeer ida-ne’e ami husi Conferência Episcopál Timorense (CET), simu konvite husi Prezidente Repúblika (PR), Francisco Guterres Lú Olo, atu fó ami-nia hanoin ruma kona-ba situasaun atuál. Uluk nanain ami fó apresiasaun boot ba Prezidente Repúblika ne’ebé fó konfiansa ba Uma-Kreda Timor-Leste. Ida-ne’e hatudu katak situasaun ne’ebé durante ne’e ita liu hamutuk, Prezidente Repúblika hatudu ninia-an nu’udár símbolu unidade”, líder Igreja Katólika ne’e apresia.

Nia akresenta, maski iha fatin barak mosu hanoin la hanesan, maibé Prezidente Repúblika koko atu hatudu nafatin nia an nu’udár símbolu unidade.

Bibi atan ne’e mós rekoñese katak prezensa CET nian la’ós atu fó hanoin no fó solusaun ba problema, maibé atu fahe preokupasaun ho Prezidente Repúblika no fó rekomendasaun oan ruma.

“Tanba ne’e, Uma-Kreda fó nia rekomendasaun maka ne’e, dezde uluk funu tempu naruk, mantein nafatin akompaña povu ne’ebé iha susar no terus, to’o tempu ukun rasik-an. Iha tempu ukun-an, Uma-Kreda mós kontinua fó nia apoiu ba kualkér Governu ne’ebé maka ukun rai ida-ne’e, atu lori rai ne’e bá-oin”, Don Virgílio subliña.

Entretantu, prezensa Arsebispu Arkedioseze Metropolitana Dili, Don Virgílio do Carmo da Silva, SDB, iha Palásiu Prezidente Nicolau Lobato akompañadu husi Bispu Dioseze Baucau, Don Basílio do Nascimento, Bispu Dioseze Maliana, Don Norberto do Amaral, Sekretáriu Ezekutivu Conferência Episcopál Timorense (CET), Padre Leandro María Alves, Vigáriu Epískopál ba asuntu Re-evanjelizasaun Arkedioseze Dili, Padre Juvito do Rego no Koordenadór Departamentu Jurídiku Dioseze Baucau, Padre Júlio Crispim Belo Ximenes.

Tempu tuir mai, Prezidente Repúblika kontinua rona opiniaun husi líder Konfisaun Relizioja sira mai husi Igreja Protestante, Musulmana, Hindu no Budista.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here