Prezidente LFTL, Nilton Gusmão. Imajen Tatoli/dok.

DILI, 30 janeiru 2020 (TATOLI)–Prezidente Liga Futeból Amadora (LFA), Nilton Gusmão hateten iha kongresu ne’ebé sei hala’o marsu mai ne’e pakote barak hodi kompete ba estrutura foun di’ak liután nune’e klube sira maka deisde.

“Tuir ha’u nia hanoin, kandidatura barak iha kongresu di’ak liután para ita bele iha no hetan hanoin foun ba dezenvolvimentu futeból iha ita-nia rain,” Nilton dehan iha edifísiu Sekretaria Estadu Juventude no Desportu (SEJD), Lecidere, Dili, kinta ne’e.

Nia haklaken, nia sei lakohi atu kandidatu-an mesak de’it hodi lidera nafatin LFA maibé hakarak ema hotu tenke kompete.

“Kandidatu tenke mai hosi parte barak. Ha’u lakohi iha kongresu ha’u mesak mak kandidata. Kandidatu seluk mai hosi independente mós bele mai atu kandidata atu hadi’a di’akliu ita-nia futeból,” nia dehan.

Nia hatutan, LFA nakloke ba parte hotu ne’ebé hakarak ho laran tebes atu lori futeból bá-oin.

“Atu hadi’a futeból ita tenke envolve iha Liga ida-ne’e maka ha’u-nia hakarak. Kandidatu balun keta mai hosi Federasaun Futeból Timor-Leste karik bele. Ita-nia sosiedade sira ne’ebé hakarak mai karik bele hakbesik-an mai haree kritéria sira,” nia sujere.

Nia hatutan, kongresu ne’ebé atu hala’o nakloke ba ema hotu atu partisipa la’ós ba de’it ema hirak ne’ebé envolve iha Liga.

Tuir oráriu ne’ebé iha, kongresu sei hala’o 21 marsu mai ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here