Prezidente CVTL, Madalena Hanjam. Imajen Tatoli/Hortençio Sanchez

DILI, 30 janeiru 2020 (TATOLI)—Prezidente Cruz Vermelha de Timor-Leste (CVTL), Madalena Hanjam, hateten nasaun viziñu sira hanesan Indonézia no Singapura hala’o prevensaun di’ak virus Corona sei la to’o Timor-Leste.

Eis Vise-Ministra Saúde ne’e afirma, oras ne’e mundu tomak hakfodak virus Corona maka afeta ona to’o Ázia. Timor-Leste mós parte hosi Kontinente Ázia, entaun tenke kuidadu tanba Timor-Leste iha entrada kona hosi Austrália, entrada mai hosi Singapura no hosi Indonézia.

“Ita espera katak nasaun hirak-ne’e maka halo atividade prevensaun di’ak ita sei la hetan moras ida-ne’e, maibé ita tenke antesipa ba públiku hotu-hotu para hadi’a imunidade. Imunidade maka ida-ne’e tenke han tuir nia dalan, deskansa di’ak, hemu bee barak. Buat sira-ne’e hotu fó forsa ba ita, fó forsa ba ita kuandu ita-nia imunidade forte ema ida lori mikródiu, maibé nia ladún transmite tanba ita-nia isin forsa para kontra ida-ne’e”, nia dehan hafoin hala’o enkontru regulár entre reprezentante CVTL ho Prezidente Parlamentu Nasionál, Arão Noé de Jesus da Costa Amaral, iha Parlamentu Nasionál, kinta ne’e.

Maski seidauk enkontru ho Governu haree virus Corona ne’e, maibé CVTL preparadu ba kualkér moras ne’ebé liga ba ema-nia vida no oinsá hasa’e imunidade populasaun nian tanba populasaun presiza han tuir dalan, hemu bee barak no hala’o ezersísiu kada loron.

“Ami preparadu kualkér oras. Se Ministériu Saúde hakarak koopera hamutuk disemina informasaun ba públiku, maibé atu kontra virus ida-ne’e imunidade maka tenke aas. Imunidade ne’e mai husi han loloos, deskansa di’ak”, Prezidente CVTL ne’e fó hanoin.

CVTL Hala’o Enkontru Regulár ho PPN

Ekipa hosi Cruz Vermelha de Timor-Leste (CVTL), hala’o enkontru regulár ho Prezidente Parlamentu Nasionál (PPN), kona-ba atividade serbisu ne’ebé durante ne’e la’o iha territóriu nasionál.

Iha hasoru malu ne’e ko’alia kona-ba atividade serbisu CVTL nian no mós atividade CVTL nian liga ho mundu tomak.

“Ami foin fila hosi Jenebra no Singapura breafing sobre atividade ne’ebé CVTL hala’o iha tempu badak oinsá maka bele iha kooperasaun ho doadór sira no responsabiliza amigu doadór sira iha mundu tomak ajuda. Ezemplu Tailándia, nia ajuda konstrui ona edifísiu CVTL nian maka parte ida ba Banku Sangue”, nia katak.

Prezidente CVTL ne’e informa ba Prezidente Parlamentu Nasionál (PPN) katak iha fevereiru ne’e uma CVTL nian inaugura no sei hahú halo instalasaun ba iha Banku Sangue.

Hafoin inaugura, Governu mós tenke apoia CVTL hodi funsiona ekipamentu mai hosi Tailándia. Hafoin ne’e, atu funsiona Banku Sangue, tanba ida-ne’e CVTL sei koopera hosi Governu liuhosi Ministériu Saúde tuir akordu oinsá maks atubele suporta ba komunidade hotu-hotu maka presiza raan.

Atividade seluk ne’ebé CVTL hala’o maka kontinua reunifikasaun família ne’ebé ke lakon durante funu nia laran no liga ho nasaun ne’ebé konfrontu polítiku hanesan Indonézia.

Nune’e mós hosi Amérika apoia CVTL ajuda liubá iha joven sira iha munisípiu hotu-hotu liuhosi voluntáriu hamtuk rihun-lima iha territóriu nasionál.

Haree ba situasaun hirak-ne’e, CVTL tau-atensaun nafatin ba saneamentu públiku, ne’ebé konstrui ona hariis-fatin no halo ona sintina iha Largo Lecidere.

“Sei hanoin mós buka osan atu halo iha fatin públiku ne’ebé ke ema soe fo’er arbiru, tanba ne’e impaktu ba moras ne’ebé iha. CVTL mós tau-atensaun ba dengue atu monu tanba udan maka’as, dengue sei eziste nafatin iha ita-nia país, oinsá ita iha kooperasaun nafatin ho Governu para halo prevensaun ida ke didi’ak”, Madalena haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here