Polisia Munisípiu Dili kaptura suspeita ho inisia FJF. Imajen/SEFOPE

DILI, 30 janeiru 2020 (TATOLI)-Komandu Polisia Munisípiu Dili kaptura ona suspeita Timor-oan ida ho inisiál FJF ne’ebé hala’o kobransa ilegál no bosok populasaun no veteranu rezisténsia sira hodi benefisia nia interese pesoál.

Asaun kaptura fragrante de lito ne’ebé PNTL ezekuta bazeia ba mandadu kapturasaun husi Ministériu Públiku, bainhira suspeita ne’e atu ba foti osan iha Bank Rayat Indonesia (BRI), Colmera, Dili, tuku 12:00,  kuarta (29/01/2020).

“Kapturasaun ne’e ita nia polisia halo bazeia ba mandadu kapturasaun, tanba suspeita  FJF ne’e bosok ona ita nia povu no ita nia aman veteranu sira,” informa Komandante PNTL Munisípiu Dili, Superintendente Xefe, Armando Monteiro,  ohin, ba jornalista iha Polisia Munisípiu Dili.

Kapturasaun ne’e PNTL ba hala’o bazeia mós ba keixa ne’ebé hato’o husi vítima sira ne’ebé hatama osan ba suspeita, atu fasilita Timor-oan balun ba servisu iha Austrália, maibé la realiza too agora.

Suspeita FJF mós durante ne’e hala’o asaun hodi bosok membru veteranu rezisténsia balun iha munisípiu hodi hatama osan kada ema ho valór $500,00 ba leten atu bele fasilita veteranu sira ne’ebé nia partisipasaun luta husi tinan 4-8, bele hasa’e sira nia dedikasaun luta husi tinan 8-14 hodi simu osan boot liután.

PNTL rasik simu ona keixa husi vítima Timor-oan hamutuk na’in 26 ne’ebé entrega ona osan.

“Ita kontinua investiga nafatin suspeita ne’e ho nia grupu sira,” afirma  Armando Monteiro.

PNTL halo apreensaun mós ba dokumentu importante balun ne’ebé suspeita lori.

Iha fatin hanesan, vítima Afonso Soares (32) husi Munisípiu Manatuto konta kronolojia katak, iha  fevereiru 2019, suspeita FJF hala’o vizita ba Manatuto hodi hala’o reuniaun ho juventude sira katak, suspeita iha komunikasaun ho Austrália atu bele fasilita Timor-oan sira atu ba servisu iha Austrália. Nune’e, suspeita husu atu joven sira ne’ebé hakarak ba  Australia tenke hatama uluk osan administrasaun kada ema $1.000.00 too $1.500.00

“Señora FJF dehan nia maka rekruta joven sira atu ba servisu iha Austrália, hala’o ho kolega na’in lima (5) mak hatama uluk osan kada ema $1.000.00 too $1.500.00 iha primeira etapa, no iha  dezembru 2019,  ami ba uluk ona Kupan maka atu ba fali Austrália, no ikus mai aumenta tan ema hamutuk 26 hein ami na’in lima (5) ba Kupan too abandona loron sia (9) iha ne’ebá. Ikus nia haruka nia alin ida lori fali ami mai husik hela iha fronteira Motain, too ami fila fali mai Dili la hetan buat ida,” dehan Afonso ho triste.

Afonso husu ba polisia atu investiga suspeita hodi bele prosesa tuir lei no husu ba suspeita atu entrega fila fali sira nia osan.

Iha parte seluk, Komandante Jerál PNTL Komisáriu Faustino da Costa dehan, parte polisia simu keixa husi vítima sira kleur ona, no halo investigasaun kleur foin kaptura suspeita.

“Ne’e hanesan krime boot ida, tanba nia bosok fali ita nia maluk Timor-oan iha munisípiu dehan reprezenta Estadu no governu ida ne’e para foti ema nia osan,” nia hatete.

Suspeita durante ne’e halai ba subar iha Kupan-Indonézia fila fali mai Timor-Leste atu ba foti osan iha banku mak polisia akompaña husi vítima ba halo detensaun.

Komandante Faustino dehan, hahalok bosok ne’ebé suspeita halo nu’udar krime sei prosesa tuir lei hodi evita hahalok ne’e labele akontese iha Timor-Leste

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here