Logotipu Tribunál Distritál

DILI, 29 janeiru 2020 (TATOLI) – Membru Parlamentu Nasionál (PN) ida iha lejizlatura da-lima ho inisiál LR ninia espoza (fen) na’in rua  ho inisiál JC (fen ki’ik) ho OF (fen boot), ohin, hasoru malu iha Tribunál  Distritál Dili (TDD) hodi hatán ba aktu krime ofensa integridade fízika simples ne’ebé previstu iha artigu 145 kódigu penal Timor-Leste.

Deputadu LR nia feen ki’ik ho inisiál JC tenke simu notifikasaun husi Ministériu Públiku (MP) hanesan arguida tanba ‘liman kaman’ (baku) hasoru LR nia fen boot OF iha kedas Estasaun Polísia Aimutin, Dili.

Kronolojia ne’ebé haktuir husi Miguel Faria nu’udar  Defeza ba arguida JC katak, faktu hosi kazu ne’e akontese tanba mosu dezentendimentu entre fen ki’ik ho fen boot.

Miguel Faria konta, antes ne’e oan husi feen boot ba iha fen ki’ik nia uma hodi husu sertidaun nia aman LR  nian hodi prosesa dokumentu atu tuir bolsu estudu, maibé tanba oan husi fen boot ne’e hasai lia-fuan la di’ak JC, entaun JC baku fen boot OF ninia oan ne’e. Ho nune’e, labarik nu’udar fen boot nia oan kesar ba nia inan OF.

La hanoin barak no naruk, momentu ne’ebá,  Miguel tenik,  OF lori kedas kazu ne’e ba keixa iha Polísia. Nune’e, JC mós tuir ba estasaun Polísia Aimutin hodi baku kedas OF iha Polísia nia oin.

Iha kazu ne’e, Ministériu públiku akuza JC nu’udar Miguel Faria nia kliente ho krime ofensa integridade fízika simple ne’ebé previstu iha artigu 145 kódigu penal númeru 1, ho karakter flagrante delitu. Tanba arguida JC kontinua halo agresaun fíziku hasoru lezada OF iha Eskuadra Polísia Aimutin, tanba ne’e polísia halo kedas detensaun ba JC durante oras 72 nia laran.

“Ha’u hanoin iha prosesu produsaun prova, arguida konfesa integralmente sein rezerva ba faktu, hato’o mós sentidu arrependimentu ba Tribunál no promete sei la komete tan krime hanesan iha futuru”, haktuir Miguel Faria hodi reprezenta arguida JC.

Iha alegasaun Ministériu Públiku husu ba Tribunál atu aplika kondenasaun ba suspensaun, maibé la espesífiku kona-ba kondena no suspende ba tinan hira.

Defeza Miguel Faria, husu ba Tribunál atu aplika pena multa, tanba arguida konfesa faktu, arrepende ba hahalok, laiha antesedente kriminál, no promete ba Tribunál la halo tan aktu hanesan iha futuru.

“Sirkunstánsia sira ne’e maka hakmaan ha’u nia kliente, tanba ne’e pena ne’ebé adekuadu liu maka pena multa. Ha’u husu pena multa”, hateten Miguel Faria.

Audiénsia julgamentu ne’ebé prezide husi juis Evangelino Belo, Ministériu Públiku reprezenta husi Prokuradór, Antonio Tavares, arguida hetan asisténsia legál hosi Miguel Faria. Prosesu adia fali ba kinta aban (30/1/2020), hodi rona desizaun finál.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here