MESSK, Longuinhos dos Santos, hasuru malu ho PM Taur Matan Ruak, ohin, iha Palásiu Governu, hodi entrega dezeñu universitáriu tolu nian. Foto GPM

DILI, 29 janeiru 2020 (TATOLI) – Konsellu-Ministru aprova orsamentu $1,5 millaun ba akizisaun materiál Scan kona-ba deteta moras no prevensaun primeiru sokoru evakuasaun ba estudante bolseiru timoroan na’in 17 iha Provinsia Wuhan, Xina.

Ministru Ensinu Superiór Siênsia no Kultura (MESSK), Longuinhos dos Santos informa, rezolusaun kona-ba kustu orsamentu $1,5 millaun ne’e aprezenta liuhusi enkontru liña ministeriál sira ne’ebé hala’o iha loron hirak liu ba.

“Hafoin rezolusaun ne’e hetan ona aprovasaun iha Konsellu-Ministru, hahú agora ita buka ona ninia mekanizmu kona-ba prosesu evakuasaun ba estudante bolseiru timoroan sira ne’ebé oras ne’e dadaun hela iha Provinsia Wuhan ne’ebá”, Ministru Ensinu Superiór Siênsia no Kultura, Longuinhos dos Santos, ba jornalista sira iha Palásiu Governu, ohin.

Nia hatutan, maske Timor-Leste nia atuasaun ka prevensaun ba virus CORONA ne’e adianta liu maibé importante mak preokupasaun oinsá atu hetan dalan hodi asegura situasaun ne’e hodi serbisu hamutuk nasaun Xina.

“Timor-Leste ho Xina iha ona konkordánsia oinsá atu apoiu sidadaun timoroan sira iha Xina. Tanba oras ne’e daudaun iha Provinsia Wuhan mak sai sentru ba sirkulasaun virus CORONA ne’e makaas liu. Ita iha ona konkordánsia ho parte embaixada Xina nian. Ne’ebé, ita hein de’it,” nia esplika.

Entretantu, nia haklaken, materiál scaner ne’ebé mak sei sosa ho intensaun sei insatala iha fatin sentru sira ne’ebé ninia atividade movimentasaun ema nian aas liu mak hanesan Aeroporto, Portu no Fronteira hodi bele kontrolu vizitante nasionál no internasionál sira ne’ebé tama mai teritóriu TL.

Notísia relevante:Governu Sei Aprezenta Kustu Evakuasaun Estudante Bolseiru Iha Wuhan Ba KM

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here