Ministru Defeza no Ministru Interior Interinu, Filomeno da Paixão de Jesus. Imajen/Tatoli Egas Cristovao

DILI, 29 janeiru 2020 (TATOLI)-Ministru Defeza no Ministru Interiór Internu, Filomeno da Paixão de Jesus, informa, Konsellu Ministru (KM) halo ona analiza ba estatutu foun Polisia Nasionál Timor-Leste (PNTL) no prosesa atu revee lei orgánika no regulamentu disiplinár PNTL nian.

Notísia Relevante : PNTL Prepara Ona Estatutu Foun no Revee Lei Orgánika

Ministru Filomeno dehan, proposta ne’e Komandu PNTL aprezenta dala rua ona no tuir planu iha marsu 2020, Konsellu Ministru halo diskusaun no aprova.

“Agora PNTL aprezenta ona (lejizlasaun) versaun ikus ona mai ha’u. Ha’u ho Tenente Koronél Caldeia, señór Komisáriu Paulo, ami hotu ne’ebé hola parte iha ekipa ne’e, sei haree iha fulan marsu bele aprezenta ba Konsellu Ministru,” hateten Ministru Filomeno, ohin, ba Ajénsia TATOLI iha Palásiu Governu, Dili.

Ministru dehan, proposta estatutu foun PNTL no revee lejizlasaun sira iha PNTL lori prosesu diskusaun naruk uitoan, tanba Governu hakarak hadi’a prosesu tomak iha PNTL bele implementa hodi fó susesu ba servisu tomak iha Komandu PNTL.

Iha estatutu PNTL nian ne’ebé presiza revee maka prosesu promosaun diviza ba PNTL  governu sei muda hanesan estatutu F-FDLT nian para haree prosesu promosaun diviza.

Ministru dehan, estatutu foun PNTL no estatutu F-FDTL ne’e Konsellu Ministru sei haree para hadi’a hotu hodi fasilita instituisaun rua bele haree membru sira ne’ebé idade tama ona reforma  bele regula tuir lei.

“Estatutu rua (PNTL-FDTL) ne’e ami tau hotu kedas para regula sira hahú husi sira tama forsa no polisia too sira sai,” tenik Ministru Filomeno Paixão.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here