Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, Dili, Kuarta (18/12/2019). Imajen/TATOLI Egas Cristovao

DILI, 29 janeiru 2020 (TATOLI)–Governu liuhosi desizaun Konsellu Ministru aprova Rezolusaun Governu ne’ebé mak aprezenta hosi Sekretária Estadu ba Igualdade no Inkluzaun, Maria José Fonseca Monteiro de Jesus, kona-ba implementasaun programa inisistiva spotlight ba eliminasaun violénsia kontra feto no labarik (Spotlight inisiative to eliminate violance agaist woman and girls Timor-Leste’s country programe).

Ministru Estadu Prezidénsia Konsellu Ministru, Hermenegildo Augusto Cabral Pereira, informa inisiativa ne’e lansa husi Uniaun Europeia (UE) no Organizasaun Nasaun Unida (ONU), ho objetivu atu elimina forma hotu kona-ba violénsia kontra feto no labarik feto iha mundu tomak.

Inisiativa ne’e atu reforsa parseria entre sosiedade sivíl, Governu, setór privadu, komunikasaun sosiál no mós parseiru dezenvolvimentu atu halo atividade barak, inklui mós luta kontra violénsia kontra feto ka violénsia doméstika. Konsellu Ministru rona aprezentasaun hosi peritu sira  husi ONU rasik no aprova duni”, tenik Ministru Hermenegildo iha Palásiu Governu, kuarta ne’e.

Nune’e, hosi inisiativa ne’e, atu koloka tema violénsia hanesan sentru esforsu globál husi igualdade jéneru no empoderamentu ba feto sira.

Programa ne’e rasik sei implementa iha Timor-Leste, iha asaun konjunta entre Governu, sosiedade sivíl, UE no ONU.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here