Ekipa Diresaun Saúde Militár F-FDTL koopera ho Asosiasaun Família Militár (AFAMA) fasilita konsulta saúde gratuita ba populasaun Suku Manleuana, Postu Administrativu Don Aleixo, Munisípiu Dili ho komunidade Suku Tibar iha Kampu Reál Madríd, Suku Manleuana, Dili. Imajen/Eugénio Pereira

DILI, 29 janeiru 2020 (TATOLI)- “Povu mak bee, FALINTIL mak ikan”. Lema ne’e sai hanesan prinsípiu ne’ebé forte tebes durante luta rezisténsia nian iha kontextu relasaun emosionál entre FALINTIL sira ho povu.

Iha tempu rezisténsia nian, Frente Armada FALINTIL iha komunikasaun ida pro-ativu tebes ho Frente Klandestina, oinsá mak fasilita komunikasaun entre FALINTIL ho povu no povu ho FALINTIL ba Timor-Leste nia auto determinasaun (ukun rasik-aan).

Ohin, Timor-Leste restaura ona nia ukun rasik-aan, husi 20 maiu 2002. FALINTIL sai ona hanesan patrimóniu lulik Timor-oan nian. Iha akantonamentu Aileu iha tinan 19 liu-ba (02 fevereiru 2001-02 fevereiru 2020) Estadu transforma FALINTIL ba FALINTIL-Forsa Defeza Timor-Leste (F-FDTL). Maibé prinsípiu FALINTIL nian sei tene metin nafatin husi F-FDTL atu serve povu, satan povu no próteze povu no sai liman kro’at povu nian ho lema “FALINTIL mak ikan, povu mak bee”.

Atu konkretiza nafatin domin ba povu ida ne’e, Komandu F-FDTL liu husi Unidade Saúde koopera ho Asosiasaun Família Militár (AFAMA), kuarta (29/01/2020), realiza programa fasilita tratamentu saúde gratuita no apoiu sasán nesesidade báziku ba populasaun Suku Manleuana, Postu Administrativu Don Aleixo, Munisípiu Dili ho Suku Tibar, Munisípiu Liquiça nian.

Xefe Estadu Maiór F-FDTL, Calistro Santo “Coliati” dehan, tratamentu saúde gratuita ne’e hala’o hodi selebra aniversáriu transformasaun FALINTIL ba F-FDTL ba dala-19 ne’ebé sei hala’o iha Kuartél Jenerál F-FDTL, Fatuhada, Dili, domingu (02/02/2020).

Nia esplika, programa  konsulta saúde gratuita nune’e nu’udar programa prioridade ida husi F-FDTL nian hodi hatudu militár nia domin ba povu, katak ‘Povu Mak Bee, FALINTIL Mak Ikan”.

Coliati dehan, durante funu tinan 24, povu maka subar FALINTIL iha ai-laran no ohin loron ukun-aan ona, FALINTIL-FDTL kontinua hakbesik-aan ba povu hodi husu hametin unidade nasionál kontribui ba estabilidade seguransa.

“Ita tenke kaer metin prinsípiu funu nian katak, ‘Povu Mak Bee, FALINTIL Mak Ikan”. Militár mesak sei la bele hala’o defeza ba ita nia rai, militár mesak sei labele garante estabilidade iha ita nia rai, para atu bele hetan pás no estabilidade tenke iha apoiu husi povu tomak,” hateten “Coliati” iha Kampu Reál Madríd, Suku Manleuana-Dili, iha ámbitu fasilita tratamentu gratuita ba komunidade Manuelana.

Iha fatin hanesan, Xefe Diresaun Saúde Militár, Majór Guido de Oliveira dehan, ba oin médiku no  doutór espesialista na’in hitu (7)  husi Komandu F-FDTL prontu koopera ho povu hodi fó nafatin asisténsia saúde.

“Forsa hanesan ikan no povu hanesan bee, ho liafuan ne’e motivasaun ida atu ami bele halo tratamentu saúde ba ita nia komunidade sira para bele hetan asisténsia saúde ho di’ak,” dehan Guido.

Iha fatin hanesan Prezidente Organizasaun AFAMA atuál Deputadu Bankada FRETILIN, Cidália Mesquita Ximenes, dehan, F-FDTL nu’udar forsa estadu nian iha relasaun di’ak ho AFAMA koopera fó asisténsia saúde sosiál no fó apoiu karidade ba kbiit laek sira hodi hatudu jestu fraternidade no domin husi F-FDTL no AFAMA ba povu.

“Ita fó konsulta ba populasaun no apoiu karidade mezmu ki’ik, maibé ami domin katak, povu hanesan bee, FALINTIL hanesan ikan, tenke servisu hamutuk kontribui ba ita nia rain no ita povu nia moris di’ak,”  dehan Espoza  husi Xefe Estadu Maiór F-FDTL, Majór Jenerál  Lere Anan Timur.

Nia dehan, ohin loron, Timor-Leste ukun-aan ona, funu la iha ona, no agora F-FDTL nia knaar boot maka luta atu liberta povu husi mukit liu husi asaun karidade sira ne’ebé sira halo.

Cidália hatutan, F-FDTL sira tenke sai belun di’ak no hakbesik ba povu atu povu tau fiar ba sira nu’udar liman kro’at ba estadu no povu.

Komunidade  sira entuziazmu hodi lori família no oan ba konsulta inklui simu sasán nesesidade báziku hanesan, ropa, sapatu pasta eskola ne’ebé AFAMA fahe.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here