Bolseiru timoroan, Nicodino da Cruz, uza masker hodi prevene an husi virus corona. Imajen/ Facebook.

DILI, 29 janeiru 2020 (TATOLI) – Embaixada Timor-Leste iha Xina fó ona apoia emerjénsia ba bolseiru timoroan na’in-17 iha Wuhan ho osan $850 atubele hola ai-han ruma.

“Daudaun ne’e, ita-nia embaixada iha Xina apoia ona ami orsamentu balun ($850) kada ema ida hetan dólar 50 atu ami bele hola hahán ruma”, Bolseiru Nicodino da Cruz ne’ebé foti kursu mestradu iha área Civil Engineering iha China University of Geosciences-Wuhan, ba ajénsia TATOLI via mídia sosiál, ohin.

Timoroan na’in-17 sei izola iha sidade Wuhan, Provínsia Hubei, hetan tulun finanseira iha tersa ne’e (28/01/2020).

“Ami haree horisehik no ohin ne’e eskola balun loke ona nia kantina no supermerkadu balun loke, mas tempu limitadu ka loke loron sorin de’it, maibé ami aproveita ida ne’e hodi sosa hahán balun”, katak.

Bolseiru husi Munisípiu Lautem ne’e dehan atu sai bá hola hahán atu han mós ta’uk virus corona. “Ne’ebé ami hamlaha mós tahan de’it, ami prefere te’in rasik”, adianta.

Nune’e, nia agradese tebes ba Embaixada Timor-Leste iha Xina tanba apoia ona orsamentu no hahú diskute ona ho Governu Xina atu evakua sira.

“Evakuasaun ba ami ne’e seidauk hatene data fiksu tanba Governu Xina seidauk autoriza nasaun estranjeiru sira atu evakua nia bolseiru sira inklui Timór”, informa.

Nicodino da Cruz salienta konforme informasaun husi embaixada Timor-Leste katak Governu liuhusi Ministériu Negósiu Estranjeiru no Kooperasaun (MNEK) haruka ona karta ofisiál ba Governu Xina, maibé seidauk iha resposta.

“Daudaun ita-nia embaixada esforsu ona foti ami-nia dadus sira hodi bele iha posibilidade evakua ami, ami hein de’it”, katak.

Hodi dehan grasa Maromak nia to’o agora bolseiru sira iha Wuhan seidauk infetadu husi Virus ne’e.

Nune’e, nia husu ba família bolseiru sira iha Timor-Leste labele pániku, maibé kontinua suporta Governu atubele prosesa evakuasaun la’o ho lalais.

Nune’e mós husu ba Governu liuliu ministériu kompetente sira atu kontinua kontrola makaas aeroportu, portu no fronteira terrestre atu prevene virus ne’e labele tama iha Timor-Leste.

Bolseiru Timor-oan na’in-19 ne’e estudu iha universidade hanesan, China University of Geosciences (Wuhan), China Central Normal University, Huazhong University of Science and Technology, Wuhan University, Wuhan University of Science and Technology, Hubei University no Zhongnan University of Law.

Notísia relevante : Governu Sei Aprezenta Kustu Evakuasaun Estudante Bolseiru Iha Wuhan Ba KM

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here