Ministra Edukasaun, Juventude no Desportu (MEJD), Dulce de Jesus Soares Hamutuk ho Estudante Eskola Ensinu Pre-Eskolar 12 Outubro Tasi Tolu. Imajen/Tatoli

DILI, 29 janeiru 2020 (TATOLI)–Ministra Edukasaun, Juventude no Desportu (MEJD), Dulce de Jesus Soares informa, oitavu Governu Konstitusionál agora daudaun hamenus oráriu merenda eskolár ba loron 10 kada fulan tanba implikasaun husi Dotasaun Orsamentu Temporáriu (DOT).

“Ha’u informa ona iha enkontru Konsellu Ministru katak situasaun ho orsamentu duodésimu ka Dotasaun Orsamentu Temporáriu (DOT) ne’e, eskola sira iha munisípiu barak liu mak sei implementa oráriu merenda eskolár menus husi loron 10,” dehan Dulce de Jesus Soares, ba Ajênsia TATOLI iha Palásiu Governu, ohin.

Tuir nia, maske MEJD mak hahú ka na’in ba programa merenda eskolár ne’e maibé orsamentu hotu sei aloka ba Ministériu Administrasaun Estatal (MAE) mak sei jere maibé MEJD kontinua fó nafatin apoiu.

“Orasamentu agora iha sira. La’os ona iha MEJD nia liman. Maibé tekníku de implemntasaun Ministériu Edukasaun, Juventude no Desportu (MEJD) kontinua fó apoiu,” nia dehan.

Kona-ba totál orsamentu ba merenda eskolár, nia hatán, Ministériu Administrasaun Estatal (MAE) mak iha koñesementu liu. Tanba, nia haktuir, MAE mak jere orsamentu sira ne’e hodi fó fali apoiu ba Dirasaun Nasionál Asuntu Sosiál Eskolár (DNASE) atu ezerse ninia programa.

Jornalista : Tomé Amado

Editór      : Rafi Belo

HAKEREK NO HATÁN

Please enter your comment!
Please enter your name here