Estudante sira Eskola Sekundária Katólika Nossa Senhora de Fátima (NOSSEF) Railaco tuir hela ezame. Imajen Tatoli/António Gonçalves

DILI, 28 janeiru 2020 (TATOLI)-Diretór Eskola Sekundáriu Jerál 10 de Dezembru Dili, Domingos Savio Gusmão, preokupa ho komunidade hamutuk uma-ka’in 15 ne’ebé maka dadaun ne’e okupa hela areadór eskola tanba perturba prosesu aprendijazén estudante sira-nian.

Diretór ne’e informa antes ne’e haruka ona karta koiñesementu ba Ministériu Edukasaun Juventude no Desportu atu koordena ho Ministériu Solidaridade Sosiál no Inkluzaun, Diresaun Terras no Propriedade, Ministériu Justisa atu foti desizaun ba kestaun refere.

Maibé to’o ohin loron parte governu rasik seidauk fó resposta ba karta ne’e hodi muda sai komunidade hirak ne’e bá fatin seluk.

“Ami atu hasai komunidade sira husi fatin ne’e maibé problema ne’e iha tiha ona nível aas ne’ebé ita hein de’it bainhira mak sira informa rezultadu ba ami,”dehan Diretór Eskola 10 de Dezembru ne’e ba TATOLI iha Comoro, ohin.

“Bainhira ita aplika regra ba alunu sira katak atu labele tama-sai por enkuantu aprendijazén la’o hela maibé, komunidade sira lakohi atu taka portaun,” nia argumenta.

Iha parte seluk, Komunidade Egas Belo, relata sira okupa areadór eskola ne’e durante tinan neen ona no pronto atu submete ba desizaun saida de’it maka governu sei foti iha futuru.

Nia hatutan sira mós hein hela promesa hosi eis Primeira Dama, Isabel Ferreira ne’ebé antes ne’e promete atu koalia ho governu hodi hasai komunidade ho dignidade.

“Eis Primeira Dama rekolla ona ami-nia dokumentu maibé to’o agora seidauk iha rezultadu,”dehan, Nia.

Jornalista : Osória Marques

Editór        : Francisco Simões

HAKEREK NO HATÁN

Please enter your comment!
Please enter your name here