Ai-nanas ne’ebé fa'an iha Loja Agrikultór. Imajen/Florencio Miranda Ximenes.

DILI, 28 janeiru 2020 (TATOLI) – Ministeriu Agrikultura e Peskas (MAP) agradese ba Ministeriu Edukasaun, Juventude no Desportu (MEJD) tanba realiza ona diskusaun atu halo revizaun ba Manuál Programa Merenda Eskolár (ME). Tan ne’e MAP espera katak ho revizaun ba Manuál ME ne’e grupu agrikultór sira bele hetan liután benefísiu tanba bele hola sira-nia produtu ba atividade ME nian.

“Ha’u hein katak situasaun ne’e sei iha mudansa ba ita-nia grupu agrikultór sira,” Diretór Nasionál Agrikultór e Arborikultura, Amaro Ximenes iha Salaun Ian Martin Matadoru, Dili, ohin.

Tanba ne’e, nia hein katak depois rezultadu finál ba revizaun ne’e mak ninia parte mós sei halo konsultasaun ba grupu agrikultór sira iha baze kona-ba saida mak sira atu halo ba futuru. Maibé, tenke konsistente ho desizaun ne’ebé hatuur ona.

“Ita tenke konsistente ho kuandu revizaun ne’e hetan ona desizaun finál. Tanba sa? Ita nia grupu agrikultór sira sei husu, ita-bo’ot sira sosa duni ami nia produtu ne’e kalae?”.

“Ne’eduni labele hamosu konfuzaun ba malu governu mós presiza iha ninia kritériu sira atu apoiu grupu agrikultór sira hodi ezerse sira nia papel nu’udar agrikultór hodi nune’e bele prodús ai-han, modo batar sira ho kualidade no kuantidade tenke tau iha atensaun,” nia reforsa.

Atu nune’e produtu sira ne’ebé sei distribui ba eskola sira ne’e, tuir Diretór Nasionál Agrikultór e Arborikultura, Amaro Ximenes bele garante duni saúde labarik sira nian tanba manuál ne’ebé mak prepara ona kompletu ona. “Espera katak bele hetan aprovasaun”.

Notísia relevante:MEJD-MA-MAE Sei Diskute Revizaun Manuál ME

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here