Sesaun plenária Parlamentu Nasionál. Imajen/TATOLI

DILI, 27 janeiru 2020 (TATOLI)—Parlamentu Nasionál (PN), sei debate asuntu Virus Corona no asuntu inundasaun ho karáter urjénsia, tanba Governu tenke halo intervensaun lalais molok Virus Corona tama territóriu Timor-Leste.

Xefe Bankada Parlamentár FRETILIN, Aniceto Guterres maka inísia atu asuntu importante rua ne’e tenke debate ho karáter urjénsia.

Rekerimentu ne’e FRETILIN aprezenta ona ba Prezidente Parlamentu Nasionál, Arão Noé de Jesus da Costa Amaral. Prezidente Parlamentu Nasionál mós simu ona rekerimentu hosi partidu FRETILIN refere.

“Ha’u dehan urjénsia ne’e kona-ba inundasaun foin inundasaun iha Tasi Tolu, maibé sé maka bele garante dehan Tasi Tolu de’it. Agora, udan foin mak hahú, entaun Governu tenke iha medida ruma. La presiza to’o bailoron. Tenke hahú identifika ona área sira ne’ebé risku ba inundasaun. Kona-ba Virus Corona ne’e ema rai seluk alerta um (siaga satu) tiha ona. Ha’u la imajina buat ne’e tama ona karik, ita lahatene. Tanba virus ne’e urjente”, Xefe Bankada FRETILIN, Aniceto Guterres, levanta liuhosi plenária Parlamentu Nasionál, segunda ne’e.

Nia haktuir, nasaun Singapura, nasaun ne’ebé ho sistema kontrolu di’akliu, maibé Virus Corona ne’e hamate ona ema na’in-haat (4).

Xefe Bankada FRETILIN ne’e husu tau asuntu rua ne’e prioridade nune’e bolu ministériu sira ne’ebé tutela bele debate no hanoin lisuk.

“Governu tenke iha prevensaun ho programa, ho polítika no medida ne’ebé konkreta. Povu labele mate tanba inundasaun. Agora, problema sériu ida tan iha mundu maka Corona. Mundu agora ho alerta um (siaga satu). ita-nia Governu prepara ona medida saida hodi prepara prevene situasaun ne’e. Timoroan sira iha Xina preokupadu, até balun tanis iha embaixada laran”, nia haktuir.

Deputadu Bankada Partidu Demokrátiku, Mariano Assanami Sabino, apoia inisiativa FRETILIN nian tanba asuntu ne’e sériu.

“Asuntu inundasaun no Virus Corona ne’e tenke prioridade. Tanba ne’e, se bele aban ita halo ona debate ba asuntu ne’e”, Assanami sujere.

Hatán ba asuntu ne’e, Prezidente Parlamentu Nasionál, Arão Noé de Jesus da Costa Amaral, hateten nia parte simu ona rekerimentu hosi partidu FRETILIN kona-ba asuntu ne’e.

“Ami simu tiha ona rekerimentu hosi Bankada FRETILIN ne’ebé aprezenta ho karáter urjénsia. Ha’u hanoin bankada FRETILIN hatama rekerimentu mai ita konsidera atu tau iha prioridade. Tan ne’e, ha’u sei konvoka reuniaun líder bankada sira atu haree asuntu ne’e ho urjentemente”, Arão katak.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Diverjensias politikas tau ses th lai tmb Nai PN sr labele manan osan saugati dt ful-fulan, halo netik bt ruma nb nudar prioridades ba povu no Nasaun

HAKEREK NO HATÁN

Please enter your comment!
Please enter your name here