Inundasaun nebe akontese iha Tasitolu hafoin udan boot iha 22-23 Janeiru 2020 tanba baleta intupidu alias bee dalan nakonu ho foer.Imajen/Antonio Goncalces

DILI, 27 janeiru 2020 (TATOLI)–Udan Bo’ot akontese iha kuarta (22/1/2020) kalan semana kotuk hamosu lalubur (inundasaun) halo bee-mota suli no tebe makaas hodi sobu-rahun tiha moru Eskola Ensinu Sekundária Jerál 5 de Maio Becora.

Diretór Eskola Ensinu Sekundária Jeral 5 de Maio Becora, Manuel Verdial infroma, bee-mota ne’ebé suli husi Karaumaten mai ne’e ho volume bo’ot hodi lori-lalin rai-henek bou hakonu sala de aula haat (4) ne’ebé to’o agora labele utiliza.

Nia hatutan, Eskola Ensinu Sekundária Jeral 5 de Maio ne’e tama kategoria iha área risku ba inundasaun tanba eskola refere lokaliza kedan iha mota ninin. Tanba ne’e, nia dehan, kada tinan kuandu tempu udan ona sempre afetadu ba lalubur.

“Ami iha sala haat lokaliza besik mota ninin agora labele utiliza, Tanba, foin lalais akontese udan-boot, mota mós tun makaas halo moru iha mota ninian rahun hotu no lalin rai-henek nakonu tiha sala de aulas haat. Ami-nia eskola ne’e afetadu ba lalubur,” dehan Manuel Verdial ba Ajensia TATOLI iha nia knaar fatin, sesta (24/1/2020).

Daudaun ne’e, nia hatutan, estudante sira halo ona limpeza jeral hodi suru sai tiha ona rai-henek iha sala haat ne’e nia laran. Maibe, tuir nia, agora estudante sira lebele uza tanba sira antisipa situasaun tuir mai.

Tanba, nia fó razaun, pezu moru nian la aguenta ho pankada bee-mota ne’ebé tun makaas lori lalin tan rai-henek tama ba aula laran. Nia infroma, nia parte halo ona karta ba Ministériu Obras Públiku (MOP) atu husu apoiu eskavatór atu suru lalais sai rai-henek iha mota laran maibé to’o agora seidauk realiza.

“Se MOP mak la apoiu lalais, udan tun tan, ha’u hanoin la’os de’it Eskola Ensinu Sekundária Jerál 5 de Maio mak hetan lalubur maibé populasaun ou komunidade inklui eskola lubuk ida iha área Becora ne’e mós sei afetadau hotu,” nia dehan.

Nia haktuir, rai-henek iha mota laran sa’e makaas tiha ona, udan mak tun tan mak sei akontese lalubur daruak hanesan iha bairru Kuarantena Tasi Tolu ne’eba mosu iha Becora ne’e.

“Tan ne’e, ha’u husu ba MOP bele aselera ninia responsalblidade atu suru sai lalais rai-henek iha mota laran hodi nune’e bele prevene situasaun ne’ebé la di’ak iha futuru,” nia hateten.

Jornalista : Tomé Amado

Editór        : Rafy Belo

HAKEREK NO HATÁN

Please enter your comment!
Please enter your name here