DILI, 27 janeiru 2020 (TATOLI)-Prezidente Asembleia Nasionál CCM Timor-Leste, Filipe da Costa hateten, organizasaun internasionál Global Fund fo apou fundu globál hodi aloka orsamentu ba Timor-Leste hamutuk $15.7 millaun ba programa luta kontra HIV/SIDA, TBC, no Malária.

Nia hatutan, Global Fund deside oinsá atu fahe orsamentu $15.7 millaun ne’e ba resipiente ka membru sira ba programa HIV/SIDA, malaria no TBC hodi tau prioridade aas liu ba moras TBC.

“Orsamentu ne’ebé atu aloka programa tolu mak ba moras TBC 43%, moras HIV/SIDA 22%, no moras malária 25%. Ami tenke tau osan rekursu barak oituan ba moras TBC para Governu bele elimina moras ne’e iha Timor-Leste,” dehan Prezidente Asembleia Nasionál CCM Timor-Leste, Filipe da Costa, ba Agência TATOLI iha Palasiu Governu, ohin.

Aleinde ne’e, nia dehan, sira-nia parte tenke tau prioridade ba moras malária tanba nasaun presiza sertifikadu eradikasaun ba tinan ida ne’e.

Tuir nia, sira mós tau osan ba moras HIV/SIDA tanba HIV/SIDA agora mós da’et makaas la’os de’it ba ema ne’ebé hanesan moris vulneravel maibé iha populasaun baibain mós aumenta.

“Ita hatene katak iha Timor-Leste detensaun kazu moras TBC ne’e makaas. Kada tinan, ita-nia populasaun ne’e aumenta hetan moras ida ne’e. Entaun, ita la hatene, tuir tan mai moras saida mak iha komunidade nia leet,” nia dehan.

Indonezia, nia dehan, besik Timor-Leste ne’ebé nia hetan númeru tolu (3)  iha mundu. Entaun, tuir nia, dala ruma Timor-Leste mós hetan kazu boot liu entaun Timor-Leste presiza esforsu an hodi investimentu makaas hodi luta kontra moras ne’e.

“Moras tolu  ne’ebé  iha Timor-Leste, agora daudaun fundu ne’e foin mai husi Fundu Globál no estadu ida ne’e seidauk tau osan. Rekursu ne’ebé ita iha ona, bele aloka didi’ak antes aban bainrua Governu tau osan,” nia infroma.

Alokasaun orsamentu ne’e, nia hateten, hakarak atu realiza Governu nia mehi hodi halakon moras TBC iha nasaun Timor-Leste tanba TBC hada’et fasil loos bainhira  me’ar iha públiku nia leet ne’e bele hada’et ema hotu hotu.

“Asembleia nasionál CCM Timor-Leste nia polítika mak atu elimina eradika malária iha tinan ida ne’e, Governu presiza elimina  TBC iha tinan 2030. Nomós tenke prevene transmisaun moras HIV/SIDA ba jersaun tuir mai. Ho ida ne’e uza didi’ak rekursu hotu-hotu ne’ebé mak ita iha,” nia esplika.

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here