Prezidente Autoridade Aviasaun Civil Timor-Leste (AACTL), Rosália Ximenes Varela. Imajen/ Tatoli Egas Cristovão

DILI, 27 janeiru 2020 (TATOLI) – Prezidente Autoridade Aviasaun Timor-Leste (AACTL, sigla portugés), Ana Rosália Ximenes Varela, informa aviaun Batik Air hato’o ona sira-nian pedidu atu halo operasaun iha Timor-Leste, maibé AACTL to’o agora seidauk bele aprova pedidu refere, tanba seidauk iha dokumentu lisensa negósiu hosi Servisu Rejistrasaun no Verifikasaun Emprezariál (SERVE).

“Kompañia Batik Air husu ami atu fó flight approval atu halo operasaun iha Timor-Leste, maibé ami seidauk bele aprova sira-nia pedidu tanba seidauk iha lisensa negósiu hosi Servisu Rejistu no Verifikasaun Emprezariál (SERVE) no AACTL seidauk hasoru formalmente na’in hosi aviaun”, nia dehan ba Ajénsia TATOLI iha Caicoli, ohin.

Nia realsa AACTL simu ona dokumentu ne’ebé Kompañia Batik Air haruka liuhusi email semana rua liu bá, iha dokumentu ne’e rasik nia konteúdu maka kompañia husu atu AACTL fó flight approval (aprovasaun vou) atubele halo operasaun iha Timor-Leste.

“Ami hein sira-nia dokumentu husi SERVE nian tanba to’o agora lisensa negósiu Batik Air seidauk iha, ami halo tuir de’it prosedimentu ne’ebé maka iha ona AACTL, kuandu dokumentu ne’ebé ami dehan kompletu ona no na’in ba kompañia mai hasoru ami, ami sei fó flight approval ba sira hodi hahú halo sira-nia operasaun Dili-Denpasar no Denpasar-Dili”, nia espera.

Maske tékniku aviaun Batik Air rasik hasoru ona AACTL hodi ko’alia kona-ba sira nia semo, maibé AACTL rasik hakarak hasoru na’in ba kompañia, nune’e fó verdade katak aviaun na’in maka ne’e no prontu atu halo atividade iha Timor-Leste.

“Kompañia presiza hetan esplikasaun direta hosi ami ACCTL, oinsá kompañia iha edifísiu, lisensa negósiu hosi Servisu Rejistu no Verifikasaun Emprezariál (SERVE) no sé maka atu jere aviaun ne’e, iha Timor-Leste”, Ana Rosália tenik.

Iha sorin seluk, Diretór Ezekutivu SERVE, Florencio Sanches, simu ona informasaun hosi Kompañia Batik Air atu fó rekizitu rejistu komersiál iha Timor-Leste.

“Ami kontente aviaun ida bele disponivel atu halo kompetisaun iha Timor-Leste no ha’u rasik manda fali rekizitu rejistu negósiu SERVE ba sira, maibé to’o agora ami seidauk simu sira-nia resposta”, dehan.

Tanba ne’e, atu halo rejistrasaun ba atividade negósiu nian iha Timor-Leste hotu-hotu tenke submete ba kritériu ne’ebé maka SERVE iha.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here