Transporte para iha Estasionamentu iha área Banco Nasionál Ultramarinho (BNU) nia oin. Imajen/Eugénio Pereira

DILI, 24 janeiru 2020 (TATOLI)-Adjuntu Prezidente Munisipiu Dili, José Filipe Ximenes Smith infroma, durante tinan rua Autoridade Munisipiu Dili estabele estasionamentu iha área lima iha Dili laran, Munisipiu Dili hatama ona reseitas $60.000 ba kofre estadu.

“Reseitas $60.000 ne’e kontribuisaun Munisipiu Dili nian ba kofre esadu. Área lima ne’ebé ezisti husi inisiu 2017 to’o 2019 ne’e mak hanesan Merkadu Taibessi, Colmera, Mandarin, zona Liberdade Imprensa no 20 de Maio,” dehan José Filipe Ximenes Smith ba Ajensia TATOLI iha nia knaar fatin, Matadoru, Balide, Dili, kuarta (23/1/2020).

Nia hatutan, maske Munisipiu Dili kontribui ona reseitas $60.000  ba kofre estadu maibé trajetu loloos ne’e seidauk atinji. Tanba, nia dehan, sei iha difikuldade tanba rekursu umanu menus.

Loloos, tuir nia, reseitas ne’e bele makaas liután bainhira ema hotu komprende didi’ak funsionamentu estasaun sira ne’e. Tanba, nia dehan, motorista sira barak mak depois para tiha iha fatin estasionamentu, bainhira pesoal sira husu sira-nia kontribuisaun sentavus 0,25, sira dehan osan rahun laiha no fila kotuk la’o daudaun.

“Sentavus 0,25 ne’e kontribuisaun ba estadu. Tanba osan sira ne’e mak sei halo fali mudansa ba fasilidade iha Kapital ida ne’e. Tan ne’e, atu ema ne’ebé utiliza ona estasionamentu sira ne’e, tenke kumpri ninia obrigasaun,” nia dehan.

Jornalista : Tomé Amado

Editár       : Rafy Belo

HAKEREK NO HATÁN

Please enter your comment!
Please enter your name here