Sekretáriu Jerál Partidu CNRT, Francisco Kalbuadi Lay ko'alia ba mídia hafoin hala'o enkontru ho Prezidente Repúblika, Francisco Guterres Lú Olo. Imajen Tatoli/Egas Cristóvão

DILI, 23 janeiru 2020 (TATOLI)–Sekretáriu Jerál Partidu Congresso Nacional de Reconstrução de Timor (CNRT), Francisco Kalbuadi Lay konsidera deklarasaun Primeiru-Ministru (PM), Taur Matan Ruak kona-ba koligasaun Aliansa Mudansa ba Progresu (AMP) la eziste ona, ne’e haree husi ‘de facto’, maibé ‘de iuri’ tenke liuhusi konferénsia. 

“De facto sim, maibé de iuri ita-boot sira hatene katak AMP harii liuhusi konferénsia no tuir lei eleitorál. Konferénsia husi partidu idak-idak depois konferénsia hamutuk. Tanba ne’e, atu toma desizaun saida mós, tenke filafali ba konferénsia. Ida-ne’e mak ha’u bele hato’o”, Kalbuadi hato’o asuntu ne’e, hafoin hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Antes ne’e, bainhira Orsamentu Jerál Estadu (OJE) tinan 2020 la pasa iha debate jeneralidade Parlamentu Nasionál, Primeiru-Ministru, Taur Matan Ruak hasoru-malu kedas ho Prezidente Repúblika hodi deklara katak hahú husi OJE xumba, AMP mós la eziste ona.

Entretantu, iha diálogu dahuluk ho Prezidente Repúblika, CNRT reprezenta husi Sekretáriu Jerál, Francisco Kalbuadi Lay no akompañadu husi kuadru sira hanesan Duarte Nunes, Virgílio Smith, Maria Rosa da Câmara ‘Bissoi’ no Terezinha Viegas.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here