Prezidente Konsellu Administrasaun ANATL, E.P, Romualdo da Silva. Foto/Natalino Costa.

DILI, 23 janeiru 2020 (TATOLI) – Prezidente Konsellu Administrasaun Navegasaun Aérea Timor-Leste (ANATL), Romualdo da Silva, hateten inundasaun ne’ebé akontese rezulta Aeroportu Internasionál Nicolau Lobato mós afeta tanba dadersán, bainhira aviaun Airnorth hosi Austrália tun labele para iha apron aeroportu nian, maibé tenke muda bá  apron delta tanba bee nalihun.

“Dadersán, aviaun Airnorth tun maibé labele para iha apron aeroportu tanba bee nalihun, entaun aviaun bá para fali iha apron delta (parajen emerjénsia) ne’ebé lokaliza iha aeroportu laran”, Romualdo ba TATOLI iha Comoro, ohin.

Nia akresenta inundasaun iha aeroportu akontese tanba volume bee ne’ebé boot hosi parte Lafatik (Kampung Baru) nian mai hanesan mota boot ida maka tun, depois halai tuir estrada tanba ezgotu la sufisiente atu asegura bee no rezulta bee tama bá aeroportu laran no afeta tebes ba parajen aviaun nian.

“Udan ne’e ita la espera, ita hotu hatene katak udan horikalan halo Dili laran no fatin balun afeta inundasaun, entaun afeta mós aeroportu”, katak.

Depois ida ne’e, internalmente koordena malu kedan ho funsionáriu bombeiru nian hodi fase kedan apron (estasionamentu), nune’e ohin operasaun aviaun take off no landing mós la’o normál fali.

“Bee uitoan tama iha terminál, maibé ohin konsege hamoos hotu ona no serbisu la’o normál, maibé ba futuru tenke hadi’a sistema drenajen atu akumula bee hotu, enkuantu bee la nalihun iha pista”, dehan.

Maibé ba oin, ANATL sei hadi’a sistema drenajen, atu oinsá bele akumula volume bee ne’ebé iha, maibé mós sei koordena nafatin ho Ministériu Obra Públika atubele hadi’a valeta iha Lafatik nian, nune’e bele prevene bee hosi ne’ebá tama bá aeroportu.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here