DILI, 22 janeiru 2020 (TATOLI)–Liga Futeból Amadora (LFA) liuhosi Diretor Étika no Disiplina, Octaviano da Conceição hateten bazeia ba reuniaun ne’ebé órgaun ezekutivu hala’o, foin lalais ne’e, deside halo demisaun ba Alexandre ‘Lexy’ Vong hosi nia kargu hanesan Sekretáriu Ezekutivu LFA.

“Ha’u ko’alia tanba liuhosi reuniaun órgaun ezekutivu Liga Futeból Amadora iha 20 janeiru foin lalais hola desizaun hasoru membru ezekutivu Alexandre Vong ne’ebé durante ne’e asume kargu hanesan Sekretaáriu Ezekutivu hatudu hahalok irregulariade no irresponsabilidade administrativa iha Liga nia laran,” Octaviano dehan liuhosi konferénsia ba imprensa ne’ebé hala’o iha salaun Xanana Sport Center, Bairru Formosa, kuarta ne’e.

Nia esplika, antes ezekutivu foti desizaun hasoru Alex Vong, sira mós haree no estuda tuir estatutu no regra hotu LFA nian.

“Órgaun Liga Futeból Amadora haree, estuda, halo analiza estatuta no regra hotu ne’ebé iha tuir konduta Liga nian no regra sira ne’ebé aplika hosi Federasaun Futeból Futeból Timor-Leste, Asian Football Confederation no Federation Football Association nian mak ami foti desizaun koletiva hasoru membru ne’e,” nia esplika.

Demisaun ne’e foti hodi suspende totál ba fundadór LFA ne’e labele envolve-an tan iha futeból hotu-hotu durante tinan-tolu.

“LFA suspende Sekretáriu Ezekutivu ne’e durante tinan-tolu sei labele partisipa iha atividade futeból hotu ne’ebé mak LFA no FFTL realiza,” nia subliña.

Nia akresenta, desizaun ne’ebé LFA foti sente todan tebes ba membru fundadór ne’e, maibé buat hotu nu’udar instituisaun ne’ebé hola responsabilidade ba papél dezenvolvimentu futeból iha Timor-Leste sente dalan refere bele hatudu ba parte hotu atu aprende oinsá mak bele haknaar-an iha instituisaun ne’ebé hetan apoiu orsamentu hosi Governu bele hala’o knaar ho loloos.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here