Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Imajen Tatoli/Egas CristovãoEgas Cristovão

DILI, 22 janeiru 2020 (TATOLI) – Konsellu Ministru (KM) aprova rezolusaun Governu kona-ba Adosaun Regulamentu Sanitáriu Internasionál (RSI), dispozitivu ida ne’ebé legál no internasionál, ne’ebé mak estabelese prosedimentu no medida sanitária ba protesaun saúde públika.

Rezolusaun Governu ne’e aprezenta hosi Ministra Saúde ein funsaun, Élia António de Araújo dos Reis Amaral, ho objetivu haforsa kapasidade vijilánsia no mós situasaun emerjénsia bele mosu iha saúde publika relasiona ba virus pneumonia ne’ebé maka daudaun ne’e akontese ona iha nasaun sira hanesan Xina, Tailándia, Japaun.

“Regulamentu Sanitária Internasionál (kria iha ámbitu OMS) ne’e maka hanesan instrumentu ida ne’ebé maka define prosedimentu ba protesaun kontra moras hada’et ne’ebé maka bele kauza iha nivel internasionál. Dokumentu ida ne’e aprova ona iha Asembleia Mundiál iha 2005 no Timor-Leste mós hola parte no ita utiliza hahú iha 2012 to’o agora, no tinan ualu ona ne’ebé presiza hadi’a filafali regulamentu ne’ebé iha, kondisaun téknika no infraestrutura bázika hodi responde ba iha preokupasaun saúde públika iha nivel internasionál nia”, Élia António afirma liuhosi konferénsia ba imprensa hafoin reuniaun KM, iha Palásiu Governu, ohin.

Aléinde ne’e, KM hasai mós rezolusaun Governu ida husu apoia interministeriál atu serbisu hamutuk hodi halo kontrolu no prevene moras ne’ebé bele fó ameasa ba saúde públika.

Vise-Ministra ba Kuidadu Saúde Primáriu, Élia António de Araújo dos Reis Amaral. Imajen Tatoli/Egas Cristovão.

“Agora daudauk iha mundu, liuliu iha Xina ne’ebé mak afetada ba moras pneumonia rasik no iha ona kazu detetadu hamutuk 180 ne’e konfirmadu hosi Xina, no kazu haat maka mate ona. Tanba ne’e akontese la’ós de’it iha Xina, maibé iha rejiaun Ázia ne’ebé besik iha Timor-Leste, entaun presiza hola medida ne’ebé maka séria hodi halo prevensaun antes”, Élia esplika.

Governante ne’e konfirma katak, virus ne’e la’ós de’it akontese iha Xina, maibé mós akontese ona iha Tailándia, Japaun, Koreia Súl no Austrália.

Atu halo prevensaun maka Ministériu Saúde (MS) sei halo vijilánsia maxima iha fronteira sira, no kontrolu ba ai-han sira ne’ebé maka tama, ai-moruk no mós saúde públika nian.

“Atu halo prevensaun maka Ministériu Saúde ativa hikas Komisaun Surtu ne’ebé maka tinan haat liubá mosu virus ida ne’ebé maka iha aeroportu rasik iha fatin izolamentu. Ministériu Saúde mós iha folla informativa ida ba ema sira ne’ebé maka viajen bá rai-li’ur no sira ne’ebé maka mai hosi rai-li’ur, liuliu pasajeiru sira ne’ebé mai hosi nasaun afetada (Xina, Japaun, Tailándia no Koreia Súl), entaun ami sei pasa informasaun ba sira, la’ós de’it pasajeiru hosi aeroportu, maibé mós hosi fronteira terrestre no marítima”, katak.

MS mós prepara karta deklarasaun saúde ba pasajeiru sira, no bainhira deteta virus hosi pasajeiru sira maka sei tau iha fatin izolamentu ne’ebé maka estabelese iha fatin hirak ne’ebé movimentu ema tama-sai.

“Sintoma hosi virus ne’e maka mosu isin-manas ho temperatura aas, no tuir informasaun katak bele halo tratamentu maibé seidauk bele halo kurativu. Tanba moras ne’e afetadu ba ita-nia pulmaun rua sei infiltra ho nune’e maka tau iha izolamentu, atu nune’e sei pulmaun infiltradu bele da’et filafali ba ema seluk, tanba ne’e maka ita Timor-Leste hakarak halo kedas prevensaun”, salienta.

MS mós sei prepara mákina (thermoscan) movel 6 hodi koloka iha fronteira, aeroportu, portu atu nune’e koko isin-manas ba pasajeiru sira ne’ebé viajen bá estranjeiru no kuandu deteta kona virus maka sei tau ketak iha fatin, nune’e Ministériu Saúde sei foti medida ruma.

Liña ministeriál sira ne’ebé sei serbisu kompostu iha Komisaun Surtu ne’e hanesan; Ministériu Finansa, Minstériu Interiór no Defeza, Ministériu Transporte no Komunikasaun.

Entretantu, atu prevene virus ne’e maka Governu Timor-Leste sei serbisu hamutuk mós ho Organizasaun Mundiál Saúde.

Moras ne’e alastra (espalla) tiha ona iha kapitál Xina, Pequim, Xangai, Guangdong, ne’ebé besik loos ho Makau, no mós Koreia Súl, aléinde Tailándia no Japaun.

Tuir Diário de Notícias ne’ebé TATOLI sita, númeru vítima mate ba tipu foun pneumonia iha Xina to’o iha tersa (21/01) ema na’in-neen, enkuantu totál ema ne’ebé infetadu sa’e ba 291. Nune’e Komisaun Nasionál Saúde país aziátiku indika nasaun ne’e rejista infetadu foun 77 iha tersa ne’e.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here