Ministru Defeza no Ministru Interiór Interinu, Filomeno da Paixão de Jesus. Imajen/Egas Cristóvão

DILI, 22 janeiru 2020 (TATOLI)–Governu sei suspende rekrutamentu ba membru FALINTIL-Forsa Defeza Timor-Leste (F-FDTL), ne’ebé antes ne’e Komisaun Rekrutamentu distribui ona formuláriu, no sei bele realiza bainhira iha ona Orsamentu Jerál Estadu (OJE) foun. 

Ministru Defeza no Ministru Interiór Interinu, Filomeno da Paixão de Jesus fó-sai asuntu ne’e iha Palásiu Prezidente Nicolau Lobato, Bairru Pité, Dili, hafoin hasoru malu ho Prezidente Repúblika, Francisco Guterres Lú Olo, ohin.

“Kona-ba rekrutamentu ba membru F-FDTL foun, hanesan ita hotu hatene, enkuantu orsamentu la sai, tenke suspende. Ha’u sei lori bá Konsellu Ministru, maibé en-prinsípiu ita sei suspende hodi hein orsamentu foun. Tanba osan laiha atu bele hala’o. Ita tenke hein orsamentu, no hafoin nai-ulun sira hetan solusuan, ita bele hala’o fali”, Paixão deklara.

Antes ne’e, Vise Prezidente Komisaun Rekrutamentu F-FDTL, Nuno de Carvalho dos Santos anúnsia katak ekipa konjunta husi Komisaun Rekrutamentu dezloka ona ba suku sira hodi rekolla formuláriu ne’ebé kandidatu sira prenxe ona, hahú husi loron 6-23 janeiru 2020.

Formuláriu ne’ebé komisaun distribui hamutuk rihun 21 ba munisípiu 12 inklui Rejiaun Administrativa Espesiál Oé-Cusse Ambeno (RAEOA), ho nia postu administrativu 65 no suku 450.

Formuláriu ne’e ho objetivu atu joven timoroan sira bele iha oportunidade hanesan, atu kompete iha vaga ba membru foun F-FDTL ne’ebé tuir planu sei rekruta na’in-600 iha tinan 2020.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here