DILI, 21 janeiru 2020 (TATOLI) – Universidade de Dili (UNDIL) prontu ona atu hetan re-Avaliasaun husi Ajénsia Nasionál ba Akadreditasaun Akadémika (ANAA) depois tinan rua liu kursu haat ne’ebé eziste la hetan akreditasaun no labele realiza prosesu inkrisaun ba estudante foun inklui la halo graduasaun ba ninia estudante finalista sira. Maibé, tinan ida ne’e UNDIL garante kursu haat ne’e sei hetan akreditasaun.

Vise-Reitór Asuntu Akadémiku UNDIL, Francisco Mausoro Martins dehan, kuandu ANAAA realiza prosesu avaliasaun ne’e sira-nia parte prontu halo tuir desizaun saida de’it mak ANAAA foti tanba prosesu ne’e rigorozu tebes no kategoria padraun internasionál.

“Presiza hatene katak ita-nia akreditór sira ne’ebé mak hamutuk ho ANAAA hala’o avaliasaun ne’e mesak ema ne’ebé iha esperiénsia internasional de’it tanba ne’e sira mai la’ós atu buka ita-nia sala maibé atu ajuda ita hodi haree parte ne’ebé mak seidauk funsiona ho di’ak, sira ajuda fó sai atu ita bele prepara atu nune’e Timor-Leste mós labele lakon edukasaun ho nasaun sira seluk”, Akadémiku UNDIL, Francisco Martins ba Agência TATOLI, iha Kampus Mascarenhas, Dili, ohin.

Nia konsidera katak avaliasaun ANAAA ne’e rigór, fundamentu no justu tebes. Nia mós haktuir, husi avaliasaun ne’e UNDIL hetan sujestaun barak tebes no presiza atu prienxe ho didi’ak. Tuir akadémiku ne’e katak iha nasaun ne’e hanesan hotu inklui instituisaun públika mós presiza hadi’a nia kualidade iha rekursu umanu, tenke aumenta tan doutoramentu, presiza hadi’a fasilidade ida adekuadu no orsamentu atu bele hasa’e kualidade dosente sira nian. “Ne’eduni UNDIL laiha razaun ida atu impede saida mak ANAAA halo.

Tanba avaliasaun sira ne’e, tuir Vise-Reitór Asuntu Akadémiku UNDIL, Francisco Mausoro Martins, ninia rezultadu ikus povu mak sei senti no aproveita. “Agora tinan rua ne’ebé ANAAA fó ba UNDIL atu prepara aan ida ne’e prienxe ona iha área rekursu umanu nian”.

Akadémiku estabelesimentu ensinu superiór privadu ne’e relembra katak iha inísiu UNDIL iha de’it dosente ne’ebé mak mai ho grau akadémiku lisensiatura, agora kuaze atu la iha ona. Signifika dosente sira iha hotu ona grau akadémiku mestradu no doutoramentu.

“Maibé rekezitu sira ne’e kada tinan sempre iha mudansa la’ós de’it tenke S2 no S3 presija mós halo peskiza, tanba husi padraun 10 ne’ebé iha idaidak mai ho ninia rekizitu purvolta 130 indikadór. Agora husi parseiru ne’ebé mak UNDIL kria mak konsege ultrapasa dezafiu barak”.

Notísia relevante:Departamentu Inglés UNDIL Prontu Kompete

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here