Diretór Investigasaun Jeolojia Institutu Petróleu no Jeolojia, Elias da Silva Cabral. Imajen Tatoli/Florencio Miranda Ximenes

DILI, 21 janeiru 2020 (TATOLI) – Ekipa Institutu Petróleu no Jeolojia (IPG, sigla portugés) sei halo fali monitorizasaun ba fatin ahi-suar manas iha área Ermeta Boot, Aldeia Fatunisu, suku Fahi-Lebo, Postu Administrativu Bazartete, Munisípiu Liquiçá, iha semana oin.

“Ami-nia ekipa mai hotu ona, halo kolleita module Amplified Geochemical Imaging (AGI) ne’ebé utiliza ba peskiza mina no gás iha Munisipiu Baucau no Viqueque, ne’ebé ami sei observa fali iha semana oin ba ahi suar manas ne’e atu haree fali”, Diretór Investigasaun Jeolojia, IPG, Elias da Silva Cabral, informa ba TATOLI Via telefónika, ohin.

Nune’e, nia husu ba públiku atu hein rezultadu observasaun husi IPG ba ahi-suar manas iha Fahi-lebo.

Antes ne’e, Elias da Silva Cabral, dehan posibilidade ahi-suar ne’e termina bainhira udan monu- rai. “Ami halo ona previzaun katak ahi-suar manas ne’e kauza husi gás monóksidu ne’ebé posibilidade sei para bainhira udan monu-rai tanba iha área ne’e tahu ne’ebé rai sei taka”, katak.

Diretór Elias salienta hafoin uza ekipamentu Carbon Monoxide Meter deteta tipu gás ne’e karbonu monóksidu, IPG halo mós identifikasaun ba rai iha ahi-suar manas ne’e ladún kle’an no tahu ne’ebé udan tuun bele termina ona.

“Ita haree depende ninian fatin akumulasaun tanba rai kle’an uitoan de’it kuandu udan posibilidade tahu sei taka”, katak.

Nune’e, IPG sei kontinua halo monitorizasaun atu rezidente iha área ne’e labele hala’o atividade besik tanba iha venenu.

“Ami kontinua husu nafatin atu abitante iha área refere labele halo atividade besik ba manifestasaun ne’e liu oras tolu no haat tanba perigu ba ema nia saúde”, sujere.

IPG mós koopera ho Sekretáriu Estadu Ambiente (SEA) atu alerta ba abitante sira atu labele hakbesik aan iha área ahi-suar manas tanba gás ne’e iha venenu.

Hatán kona-ba ekonomikamente gás monóksidu ne’e bele halo esplorasaun, Diretór IPG ne’e dehan bele halo depende haree ba depózitu nia kle’an.

“Até agora ami seidauk identifika gás monóksidu depózitu ho ninian montante ninia no ekonomikamente viavel ba esplorasaun, ne’ebé ami sei kontinua monitoriza hodi hala’o estudu”, afirma.

Rezultadu identifikasaun IPG ba suar refere ho temperatura ho grau célcius 400 no akumula ho gás monóksidu (CO) ho grau entre 160-180 ppm.

Gás monóksidu ne’e mai husi materiál orgánika hanesan planta ne’ebé uluk mate, depois akumula no depózitu iha kamada arjila ou arenitu nia laran, iha ambiente menus oksijéniu no hetan presaun temperatura ne’ebé aas até altera materiál sira ne’e sai gás.

Ahi-suar ne’e akontese iha 30 outubru 2019, maizumenus tuku 03.00 loraik. Tuir informasaun abitante sira katak la’ós foin akontese ba dahuluk, maibé iha 1985 mós akontese ona iha área refere ho distánsia husi fatin agora maizumenus kilómetru haat, besik estrada Dili bá Ermera nian.

Notísia relevante : Ahi-Suar Manas Iha Fahi-Lebo Hahú Menus

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here