Tribunal Distritál Dili

DILI, 21 janeiru 2020 (TATOLI) – Funsionáriu Ministériu Edukasaun (ME) na’in tolu, ohin, partisipa iha audiénsia julgamentu iha Tribunal Distritál Dili (TDD)  hodi responsabiliza ba krime administrasaun da nosa ho pekulatu.

Arguido na’in tolu ne’e, kompostu husi arguido AS, arguida DF ho arguida IB.  Tuir akuzasaun Ministériu Públiku ba arguido AS deskonfia komete krime rua administrasaun da nosa no mós krime pekulatu ne’ebé previstu iha artigu 274 ho 295 husi kódigu penal.

Arguida DF deskonfia komete krime pekulatu, ne’ebé previstu iha artigu 295 husi kódigu penal no  arguida IB deskonfia komete krime pekulatu ne’ebé previstu iha artigu 295 husi kódigu penal.

Arguido sira mós uza osan estadu hodi halo atividade ministériu nian, maibé realidade arguido sira utiliza osan ne’e hodi apropriadu ba sira nia interese, no mós fó prejuízu ba estadu kuaze $4.460,00.

Prokuradór substitui husu ba tribunál atu halo adiamentu ba prosesu ida ne’e tanba prokuradór iha prosesu seluk atu halo julgamentu ho oras ne’ebé hanesan.
Tanba ne’e mak Tribunál deside adia julgamentu ne’e ba fali loron 4 Fevereiru 2020, tuku 09:00 OTL hodi rona deklarasaun arguido sira.

Audiénsia julgamentu ne’e preside husi Juiz koletivu, João Ribeiro, Maria Solana, Maria Modesta, Ministériu Públiku reprezenta husi Prokuradór Jacinto Babo substitui husi Luis Hernani Rangel no arguido sira hetan asisténsia legal husi Defensór Públiku inklui mós advogadu privadu Pedro Aparicio.

Jornalista : Domingos Piedade Freitas

Editór        : Francisco Simões

 

HAKEREK NO HATÁN

Please enter your comment!
Please enter your name here