Koordenadora Interina ba Reforma Lejizlativa iha MRLAP, Melisa Silva Caldas. Imajen/Egas Cristovão

DILI, 20 janeiru 2020 (TATOLI)–Iha tinan 2019, Ministériu Reforma Lejizlativa no Asuntu Parlamentár konsege finaliza no aprezenta ona lejizlasaun tolu hanesan Lei Arbitrajen, atu halo adezaun ba konvensaun arbitrajen nian, no alterasaun ba Kódigu Prosesu Sivíl.

“Tolu ne’e aprova ona iha Konsellu Ministru iha tinan kotuk no hein Primeiru-Ministru atu lori aprezenta iha Parlamentu Nasionál”, tenik Koordenadora Interina ba Reforma Lejizlativa, Melisa Silva Caldas ba Agência TATOLI, iha Palásiu Governu, segunda ne’e.

Nia informa, daudaun ne’e parte MRLAP sei hala’o inisiativa lejizlasaun hitu no haat husi inisiativa ne’e submete ona ba Prezidénsia Konsellu Ministru (PCM-sigla portugés).

“Haat hein atu ajendamentu iha Konsellu Ministru mak rejime jurídiku seguransa sosial ba titulár órgaun soberania nian, proposta lei autorizasaun lejizlativa baze jerál organizasaun administrativa, projetu dekretu lei kona-ba organizasaun administrasaun direta no indireta Estadu nian, no mós ita iha rezolusaun Governu nian atu aprova programa reforma administrasaun públika.”, nia subliña.

Aleinde inisiativa hirak-ne’e, nia haktuir, iha mós pakote Lei Administrasaun Públika ne’ebé hein ajendamentu iha Konsellu Ministru.

“Ita atu halo proposta lei barak kona-ba baze jerál administrasaun públika no mós projetu dekretu lei kona-ba administrasaun direta no indireta Estadu, liuliu kona-ba oinsá atu harii institutu públiku sira”, nia salienta.

Jornalista: Julia Chatarina

Editór: Xisto Freitas

 

HAKEREK NO HATÁN

Please enter your comment!
Please enter your name here