DILI, 20 janeiru 2020 (TATOLI)- Xefe Sentru Saúde Becora, Adelina Pinto hateten, Sentru Saúde Becora menus ai-moruk orál, nune’e pasiente sira ne’ebé halo tratamentu iha Sentru Saúde Becora sempre transrefere ba Hospital Nasional Guido Valadares (HNGV).

“Tinan tomak ida iha 2019, difikuldade ne’ebé ami hasoru iha área medikamentu nian liliu iha área saúde orál nia, reazente ka ai-moruk ne’ebé uza para fokit nehan nian mak menus, hodi nune’e la dun halo tratamentu iha ne’e, karik moras ruma mai atu fokit nehan sira sempre refere ba ospitál Nasional,” hateten Xefe Sentru Saúde Becora, Adelina Pinto, ba Agência TATOLI iha nia kna’ar fatin, ohin.

Entretantu, Médiku Dentista, Ivo da Cruz haforsa, durante ne’e ba atendimentu saúde orál iha sentru saúde Becora la’o ho di’ak maibé iha problema kona-ba ai-moruk orál.

“Ai-moruk mak sempre iha difilkuldade uitoan tanba maioria pasiente ne’ebé mai halo konsulta iha ne’e mak fokit nehan. Atendimentu ne’ebé mak iha halai liu kona-ba prevensaun,” nia informa.

Kona-ba prevensaun, nia hateten, iha difikuldade uitoan kona-ba ai-moruk tanba ho kondisaun daudaun ne’e Governu la’o ho orsamentu duodésimu.

Nia hatutan, timoroan maioria ninia koñesimentu atu kurativu nehan-moras  ne’e hakarak atu losu de’it duké hili atu halo prevensaun.

“Ita kuandu kurativu ne’e, sira hakarak kurativu barak liu mak losu ne’e. Maibé atu halo prevensaun ba nehan ne’e ladun no dalaruma ami mós menus pessoal nehan ni’an oituan,” nia informa.

Daudaun ne’e, nia informa, iha Sentru Saúde Becora iha dentária ni’an, pesoál saúde iha médiku dentista na’in ida (1) no asisténsia na’in rua (2).

Jornalista : Nelia Fernandes

Editór       : Rafy Belo

 

HAKEREK NO HATÁN

Please enter your comment!
Please enter your name here