DILI, 20 janeiru 2020 (TATOLI)–Maski koligasaun Aliansa Mudansa ba Progresu (AMP) la eziste ona, maibé Primeiru-Ministru (PM), Taur Matan Ruak, sei asume knaar to’o Primeiru-Ministru foun iha, tuir desizaun Prezidente Repúblika (PR), Francisco Guterres Lú Olo.
Taur deklara asuntu ne’e, hafoin soru-mutuk ho Prezidente Repúblika, iha Palásiu Prezidente Nicolau Lobato, Bairru Pité, Dili, segunda ne’e.
“Tuir lei, enkuantu seidauk iha Primeiru-Ministru ida troka ha’u, ha’u sei kontinua Primeiru-Ministru. Aban, Primeiru-Ministru foun iha ona, entaun, bainrua ha’u la mai ona. Ha’u kontinua prontu atu kontribui bainhira iha desizaun saida de’it”, nia deklara.
Taur mós rekoñese katak iha istória Timor nian, úniku nia mak menus husi tinan rua, aprezenta orsamentu ba dala haat.
“Signifika, estraórdináriu. Falta de’it Parlamentu Nasionál mak tara PM iha ai leten. Deputadu CNRT mak sobu AMP. Ha’u onradu ba konvite atu lidera AMP, liuliu CNRT nian atu lidera Governu ida-ne’e. Agradese ba apoiu hotu, maibé ha’u hakarak hateten katak ha’u la gosta presaun no santájen” Taur realsa.
Ho situasaun ne’e, Taur Matan Ruak husu ba públiku katak bainhira iha ema ruma ne’ebé aproveita situasaun ida-ne’e hodi tama-sai uma atu halo propaganda, tenke informa ba polísia.
Iha okaziaun hasoru-malu ho Prezidente Repúblika, Taur Matan Ruak aproveita hodi lori nia naran rasik, família no Oitavu Governu Konstitusionál hato’o boas festa Santu Natál no Tinan Foun ba Prezidente Repúblika no funsionáriu sira hotu.
Aleinde ne’e, nia informa mós ba Xefe Estadu katak situasaun seguransa rai-laran hafoin tinan foun kontinua la’o hakmatek, maski iha dezastre balun hanesan iha Manleuana no fatin seluk tan.
Jornalista: Cipriano Colo
Editór: Xisto Freitas
AMP sei eziste hela.
OGE 2020 deit mak lapassa.
Klaru katak PM nafatin Sr. TMR