Jerente Loja Agrikultór Fatuhada, Jacinto Perreira. Imajen/Florencio Miranda Ximemes.

DILI, 20 janeiru 2020 (TATOLI) – Jerente Loja  Agrikultór Fatuhada, Jancinto Pereira, hateten halo ona proposta ba Ministériu Agrikultura no Peska (MAP) atu sosa karreta hodi tula produtu agríkola sira iha munisípiu hodi mai fa’an iha Loja Agrikultór iha Dili.

“Ami-nia planu hatama ona ba MAP atu sosa karreta box pendingin ida atu fasilita asosiasaun ka grupu sira ne’ebé hetan apoia husi tékniku MAP hanesan hakiak ikan, fahi no manu inklui modo atubele tula mai iha Loja Agrikultura hodi fa’an”, Jerente Loja  Agrikultór ne’e ba Ajénsia TATOLI iha Fatuhada-Dili, ohin.

Tanba nia observa katak munisípiu ne’ebé distánsia dook husi kapitál hanesan Lautem, Manufahi, Baucau no RAEOA ne’e seidauk lori nia produtu ne’ebé dodok lalais, maibé lori de’it produtu ne’ebé bele rai kleur.

“Ita laiha fasilidade atu fasilita sira hodi lori produtu lokál ka agríkola ne’e mai iha Dili ka Loja Agrikultór ne’e”, katak.

Aleinde ne’e, Loja Agrikultór ne’e mós simu preokupasaun no lamentasaun tanba kondisaun seidauk sufisiente atu rai modo no naan fahi, manu no ikan kleur.

“Tanba ita hatene modo ne’e ita presiza fa’an to’o loron rua ou tolu de’it, tanba fasil atu dodok no iis ne’ebé ami dala ruma fa’an mai to’o loron rua la di’ak ona”, dehan.

Nune’e, Jerente Loja Agrikultura ne’e dehan daudaun planeia ona atu monta ár kondisionadu (AC, sigla inglés) atubele rai modo ho ai-fuan sira kleur uitoan.

“Iha ne’e risku liu mak modo hanesan repollu, modo metan, mutin no seluk ne’e ita hatene mai iha ne’e mas dala ruma la to’o loron tolu ne’e dodok ona”, salienta.

Daudaun, produtu sira ne’ebé fa’an iha Loja Agrikultór ne’e, asosiasaun agrikultór no indivíduu sira mak diretamente lori bá fa’an iha loja refere.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here