Representante Diretór Jerál HNGV, Duarte Marçal Araujo. Imajen/ Tatoli Egas Cristovão

DILI, 20 janeiru 2020 (TATOLI)- Diretór Administrasaun, Finansas no Lojístika HNGV, Duarte Marçal de Araújo hateten,  iha janeiru 2020 ne’e Governu aloka orsamentu duodésimu ba Hospital Nasional Guido Valadares (HNGV)hamutuk $822.000.

“Orsamnetu duodésimu ne’e kobre ba saláriu no bens servisu nian. Orsamentu duodésimo ne’e nia implikasaun mai ami mak hanesan ami-nia planu sira hanesan atu harii ospitál foun ne’e la realiza ona. Hein fali Orsamentu Jerál Estadu iha mak ami realiza fali,” Diretór Administrasaun Finansas no Lojístika HNGV, Duarte Marçal de Araújo, dehan ba jornalista sira iha nia kna’ar fatin, ohin.

Ezemplu, nia hatutan, sira iha planu prioridade mak atu hadi’a ospitál, hadi’a haris fatin no sala enfarmaria sira maibé ida ne’e sira tenke hein.

“Ha’u bele dehan to’o. Tanba, importante mak ne’e orsamentu kona-ba alimentasaun pasiente ne’e hanesan item ida ne’ebé importante ba HNGV,” nia informa.

Nia hatutan, orsamentu ba saláriu konta bankaria no kontratu ba funsionáriu kontratadu hanesan ema sira ne’ebe hala’o limpeza iha HNGV hamutuk 300 itál.

“Ba fulan fevereiru ba oin hanesan ne’e mak Governu ne’e aloka nafatin orsamentu hanesan ne’e, ha’u sente osan ne’e to’o hela ba HNGV ne’e la implika ba buat ida,” nia dehan.

Orsamentu duodesimu ne’e, nia hatutan, laiha implikasaun ba alimentasaun ba pasiente maibé orsamentu refere bele kobre ba alimentasaun.

“Alimentasaun ba pasiente ne’e kobre to’o fulan tolu. Tanba osan ba ida ne’e antes ami tau hela. Ami analiza katak kada fulan ne’e $60 mil. Maibé, realidade agora seidauk to’o mezmu ke pasiente ne’ebé mak sa’e, sira sa’e to’o $56 57 mil kada fulan,” nia informa.

Nune’e mos, nia dehan, la implika mós ba ai-moruk tanba iha tinan 2019 Governu aloka ona osan adisionál ba Servisu Autonómo Medikamentu Ekipamentu Saúde (SAMES) ne’e $2 mil ne’ebé agora uza hela.

“Liuhusi mekanizmu aprovizionamentu, ami kria katak husi farmasia sira ne’e mak manan prosesu ida ne’e mak Farmasia Bethesda. Bainhira ami haree lista husi SAMES la iha, entaun ami haruka Farmasia Bethesda mak hatama ai-moruk ne’ebé ba iha fulan tolu nia laran no ha’u sente la iha problema ho aimoruk,” nia hateten.

Nia informa, item seluk mak ne’e kona-ba pasiente ne’ebé aumenta no kama sira la to’o tanba ne’e mak sira serbisu maka’as hodi kontaktu ba iha Ministériu Saúde para haree to’ok sentru saúde internamentu sira hanesan Sentru Vera Cruz Comoro, karik  sira iha kama rezerva karik bele haruka mai hodi HNGV bele uza.

Jornalista : Felicidade Ximenes

Editór         : Rafy Belo

HAKEREK NO HATÁN

Please enter your comment!
Please enter your name here