Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR

DILI, 20 janeiru 2020 (TATOLI)–Prezidente Repúblika (PR), Francisco Guterres Lú Olo, fó ona orientasaun ba Xefe Kaza Sivíl, Francisco María de Vasconcelos atu prepara konvite atu konvida entidade sira atu rona sira-nia opiniaun oinsá foti desizaun ba situasaun atuál. 

“Prezidente Repúblika fó ona orientasaun ba ha’u atu prepara konvite hodi bele konvida sira mai. Atu rona opiniaun saida mak di’ak liubá ita-nia Estadu ida-ne’e. Aban (21/01/2020) konvite sai, maibé ha’u labele ko’alia uluk antes Xefe Estadu deklara nia pozisaun”, Xefe Kaza Sivíl hato’o lia hirak-ne’e, hafoin partisipa kuda ai-oan ne’ebé organiza husi Prezidénsia Repúblika iha Faról, Dili, ohin.

Nia subliña katak, to’o oras ne’e, Prezidente Repúblika seidauk deklara ninia pozisaun, maibé orienta de’it atu prepara konvite, nune’e, bele konvida líder partidu polítiku sira hodi trata asuntu ne’e.

Entretantu, líder polítiku sira ne’ebé Prezidente Repúblika sei konvida mak hanesan líder bankada Parlamentár sira, líder nasionál sira, sosiedade sivíl, jurista sira, konfisaun relijioza sira, liuliu bispu sira atu rona opiniaun ema hotu nian.

Entretantu, iha loron ohin mós, Primeiru-Ministru, Taur Matan Ruak hasoru malu ona ho Prezidente Repúblika hodi deklara katak koligasaun Aliansa Mudansa ba Progresu la eziste ona no prontu atu kolabora no simu kualkér desizaun husi Xefe Estadu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here