Vendedór ida dudu hela nia karrosa ho sasán hodi fa’an ba komunidade sira ne’ebé tuur hein hela mikrolete no karreta seluk iha terminál Taibesi. Imajen/Antonio Gonçalves.

DILI, 19 janeiru 2020 (TATOLI)-Xefe Jestaun Merkadu Taibesi, Anibal de Jesus preukupa ho lixu iha Merkadu Taibesi tanba, lixu iha merkadu nunka moos.

“Ha’u preukupa kona-ba lixu, ne’e iha merkadu lixu ne’e nunka dehan atu moos tanba ho vendedór 13 munisípiu mós akumula hotu iha ne’e, ne’ebé lixu ne’e sempre iha, foti sai tiha mós fakar nafatin,” Xefe Jestaun Merkadu Taibesi, Anibal de Jesus ba Agência TATOLI, ohin.

Tanba ne’e, nu’udar jestór, nia sujere ba autoridade kompetente sira katak presiza tau karreta permanente rua iha área Merkadu Taibessi bele transporta fo’er sira.

“Agora garante hela ho karreta ne’ebé mak foti lixu kontratu husi Autoridade Munisípiu Dili tanba sira foti hanesan dala ida, dala rua, lixu ne’e foti la hotu tanba ho kontratu sira dala ruma foti dala rua ou dala tolu, dala ruma sira la foti to’o dala tolu. Ida ne’e mak ami hasoru dezafiu ne’e,” nia dehan.

Xefe Jestaun Merkadu Taibesi, Anibal de Jesus informa mós katak difikuldade seluk ne’ebé mak iha Merkadu Taibessi mak eletresidade; balun lakan, balun mate.

“Ahi ne’ebé iha terminál laran ne’e hanesan, kalan ami liga ba iha PLN, dehan ne’e kompañia nian kompetente, ne’ebé ami la hatene kompañia ida ne’ebé to’o agora kompañia la mai. Ami tenke buka meius oinsá para bolu ema husi liur fila fali para bele mai halo lakan,” nia katak.

Nia aumenta, Kona-ba bee hariis fatin normál tanba bee ne’e nunka para. “Bomba kuandu keima, ami buka meius para troka kedas bomba ne’e, ne’ebé kona-ba bee la’o normál”.

Hatan ba preukupasaun negosiante sira halo negoio la hakmatek, Jestaun Merkadu Taibesi ne’e rekoñese ida ne’e tanba dehan katak trotoar ka terminál la iha regra atu negosiante sira ba nahe lona. “Ha’u rasik hasai regra ko’alia to’o dala tolu, avizu to’o dala tolu ko’alia dala rua la rona, dala tolu ha’u haruka aruma, tanba ne’e iha lei ona, trotoar leten no terminál laran, ne’ebé bandu labele halo negosiu”.

Xefe Jestaun Merkadu Taibesi, Anibal de Jesus haktuir, iha tempu liubá iha “Merkadu Barratu” maibé halo karta. Nune’e, autoriza negosiante sira halo negosiu maibé liu ida ne’e tenke sobu. “Mas, balun hanoin dehan halo permanente, ita hateten dehan lae, ha’u ho ha’u-nia membru sira sobu rasik”.

“Horbainhira iha ekontru dala tolu, mak foin iha ida ne’e, maibé iha fulan ida de’it toleránsia ba fulan ida de’it, loron bo’ot, mas liu ida ne’e sobu,” nia reforsa.

Nune’e, Nia akresenta katak kona-ba negosiante sira ne’ebé fa’an hela iha trotoar sira agora daudaun ne’e mai husi Liquiça, Hera, Metinaro, ne’ebé ne’e la’ós permanente.

“Sira ne’e hanesan modo kanko sira ne’e hotu sira fila, ne’e ami tolera, ne’ebé sira iha trotoar leten liubá, ne’ebé mak la iha impaktu ba karreta no motor ba ida ne’e ha’u utiliza ne’e ba sira”.

Iha biban hanesan, Jestór Merkadu Anibal de Jesus reforsa, durante iha Merkadu Taibesi, problema grave liu la iha, problema só hada’u malu modo, fatin, ida ne’e halo atualmente ida ne’e la kestiona.

“Ami só esforsu liu iha kalan, tanba ami seguransa la iha, pois ami la iha ekipamentu, ne’ebé ha’u rasik mós kalan tenke mai, tanba atensipa iha kalan, tanba lanu hosi fatin-fatin mai hotu iha ne’e”.

“Durante ne’e ha’u koopera ho PNTL eskuadra na’in feto, ne’ebé kalan sira apoia halo mós seguransa tanba hasoru impaktu ne’e tanba funsionáriu husi MCI nian seguransa iha ne’e agora para; área bo’ot Merkadu Taibesi hanesan ne’e kontrola araska uituan,” nia dehan.

Nia hatutan, durante mandatu to’o agora, besik tinan haat resin ona, la iha ema ruma hakotu iis tanba agresaun ba malu entre ema sira iha Merkadu laran. “Foin lalais iha maibé la pertense iha área merkadu laran. Ne’e iha Kampu, iha ne’ebá no problema iha Merkadu ne’e mak hada’u malu sasan”.

“Ezemplu, karreta tama husi foho hada’u malu sasan, ida fó liu fó menus ne’e mak problema, depois bolu mai kantor negosiante sira halo deklarasaun, buat ki’ik sempre akontese,” nia katak.

Nune’e, tuir nia, durante ne’e jestaun Merkadu Taibesi halo reuniaun fulan ida dala tolu ho vendedór sira no iha Komunikasaun entre ekipa jestaun no negosiante iha komunikasaun di’ak.

Entretantu, durante iha Merkadu Taibesi ne’e rasik loron kinta ekipa jestaun merkadu sira halo avizu hodi kada sexta limpeza jerál, husi segunda to’o kinta parte seguransa mak halo limpeza.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here