Aprezentasaun no votasaun ikus ba OJE 2020 iha jeneralidade, iha PN. Imajen Tatoli/ Egas Cristóvão

DILI, 17 janeiru 2020 (TATOLI)—Hafoin proposta Orsamentu Jerál Estadu (OJE) 2020 la pasa iha faze jeneralidade, Bankada Parlamentár Partidu Frente Revolucionária de Timor-Leste Independente (FRETILIN) no Partidu Demokrátiku (PD), husu líder nasionál tuur hamutuk solusiona inserteza polítika iha rai-laran.

Deputadu Bankada Parlamentár FRETILIN, Antoninho Bianco, fiar katak Aliansa Mudansa ba Progresu (AMP) sólidu hela.

“Maibé ami fiar katak situasaun ne’e bele fanun líder istóriku sira atu hakbesik ba malu, ko’alia ba malu, rona malu no halo-tuir ba malu. Ha’u fó onra ba líder istóriku sira hotu no eroi no mártir sira fanun ita. Tempu ona atu hakbesik ba malu nune’e lori nasaun ne’e ba-oin”, nia dehan iha ámbitu proposta Orsamentu Jerál Estadu (OJE) 2020 la pasa iha debate faze jeneralidade iha Parlamentu Nasionál, sesta ne’e.

Enkuantu, Deputadu PD, Mariano Assanami ‘Sabino’ vota a-favór nu’udar reprezentante povu la’ós hanesan prezidente partidu.

“Ha’u-nia votu a-favór ne’e para maun-boot sira ko’alia ba-malu, respeita malu, kaer telefone ne’e dere ko’alia ba-malu. Tanba ne’e maka ha’u dehan katak orsamentu ne’e raan Estadu nian”, Assanami tenik.

Nia haktuir, AMP ida antigu bainhira orsamentu ne’e seidauk tama, sira hala’o enkontru regulár koligasaun, nune’e bele ko’alia ba-malu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here