Prezidente Autoridade Rejiaun Administrativa Espesiál Oe-Cusse Ambeno-Zona Espesiál Ekonomia, Sosiál no Merkadu, José Luis Guterres, asina akordu ho Empreza Of Line Development Inc., husi Estadu Unidu Amérika (EUA), Paul Joseph Perrina, atu investe iha Oe-Cusse. Imajen/ Florencio Miranda Ximenes.

DILI, 17 janeiru 2020 (TATOLI) –  Prezidente Autoridade Rejiaun Administrativa Espesiál Oe-Cusse Ambeno (RAEOA) no Zona Espesiál Ekonomia, Sosiál no Merkadu (ZEESM), José Luis Guterres “Lugu”, asina akordu (MoU, sigla inglés) ho na’in ba Empreza Of Line Development Inc., husi Estadu Unidu Amérika (EUA), Paul Joseph Perrina, ne’ebé hakarak investe iha Oe-Cusse.

“Asina memorandu ne’e, RAEOA ho emprezáriu ida husi Estadu Unidu Amérika ne’ebé iha esperiénsia barak no hakarak konstrui otél ne’ebé di’ak, konstrui sentru entretenimentu (entertainment center) no sira mós hakarak konstrui fatin reuniaun nian ne’ebé iha kapasidade internasionál inklui kasinu,” Prezidente Autoridade RAEOA, José Luis Guterres, hafoin asina akordu ho empreza ne’e iha edifísiu RAEOA-ZEEMS, Faról, ohin.

Nia hatutan MoU ne’e fó durasaun fulan neen ba kompañia EUA atu halo estudu vizibilidade iha Oe-Cusse atubele haree área potensiál sira hafoin hala’o konstrusaun.

“Iha akordu ne’e, fó durasaun fulan neen ba sira atu halo estudu vizibilidade, depois ida ne’e halo tan akordu ida definitivu ho sira (empreza EUA) para projetu ne’e bele komesa ona”, katak.

Nune’e, Lugu adianta setór tolu (otél, sentru entretenimentu no sentru konvensaun) ne’ebé empreza hakarak investe ne’e importante tanba sai pontu atrativu ba iha turista atubele mai iha Timor-Leste liuliu Oe-Cusse.

Hodi dehan, kontente asina akordu ne’e ho empreza ne’ebé iha belun barak iha EUA no mós iha ligasaun di’ak ba administrasaun EUA ne’ebé hakarak mai investe iha Timor-Leste.

“Empreza halo estudu vizibilidade ne’e,  ami sei fasilita sira bá vizita ita-nia rai iha Oe-Cusse atu haree  potensiál sira liuliu beleza tasi no foho, atu haree potensialidade ba investimentu ne’e”, afirma.

Eis Ministru Negósiu Estranjeiru no Kooperasaun ne’e salienta, durante fulan neen, ekipa RAEOA liuliu iha área investimentu no ekonomia sei serbisu di’ak ho sira no kria kondisaun atu hala’o estudu hodi implementa projetu saida mak sira hakarak halo iha rai-ketan.

“Ami asina akordu ona ne’ebé komesa agora sira bele halo ona estudu vizibilidade”, katak.

LUGU hateten investimentu saida de’it mak tama iha Oe-Cusse presiza haree no respeita kultura, meiu ambiente no direitu hodi benefisia povu no rai doben Timor-Leste.

Na’in ba Empreza Of Line Development Inc., Paul Joseph Perrina, hatete akordu ne’e atu hametin relasaun ho povu Timor-Leste liuhusi hakarak halo investimentu sira iha Timor-Leste liuliu Oe-Cusse.

“Ami nia MoU ne’e sei foku liu ba estudu vizibilidade ba otél no sentru entretenimentu no sentru konvensionál”, nia hato’o.

Hodi dehan kontente asina akordu ne’e tanba hakarak duni hala’o investimentu iha Timor-Leste.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here