Ministra Edukasaun, Juventude no Desportu, Dulce de Jesus Soares, ko'alia ho Vise-Ministru Edukasaun, Juventude no Desportu, João Zacarias Freitas Soares, iha sala enkontru Konsellu Ministru, kuarta, (21/9). Imajen António Goncalves

DILI, 16 janeiru 2020 (TATOLI) – Orsamentu ba bens no servisu Ministériu Edukasaun, Juventude no Desportu (MEJD) inklui Sekretáriu Estadu Juventude no Desportu (SEJD) ho montante hamutuk $19.325 no esklui SEJD ho montante hamutuk $17.864. Nia objetivu mak sei uza hodi asegura planu no programa prioridade MEJD hamutuk 13 ne’ebé mak trata ona.

Programa 13 ne’e mak hanesan Pagamentu Konsensaun Eskolár iha nivel ensinu hotu-hotu, implementasaun reforma kurrikulár ensinu nivel terseiru siklu ensinu báziku no sekundária,  fornese material didátiku, inklui ba pre-eskolar sira no mós livru ba primeiru no segundu siklu ensinu báziku no sekundáriu.

Ministériu mós sei reforsa atividade ekstra-kurrikulár iha nivel eskolaridade, preparasaun atu realiza ezame nasionál 2020, sei aselera mós formasaun akadémika baxarellatu nu’udar programa kontinuasaun ba profesór sira. Selu mós Profesór Portugés no timoroan sira atu asegura funsionamentu eskola CAFE,  reforsa jestaun eskolár inklui  lisensamentu eskolár.

Nune’e mós implementasaun atividade ne’ebé  atu asegura inkluzividade kona-ba produsaun materiál ba sensibilizaun no jéneru.  Atu reforsa lei no polítika sira inklui lei establesimentu sistema jestaun pre-eskolár, halo mós pagamentu retensaun ba projetu konstrusaun ne’ebé realiza iha 2019, iha mós programa monitorizasaun no Inspesaun edukativa.

Programa ikus mak sei tau-matan ba servisu operasionál MEJD nian hanesan manutensaun karreta, konbustível materiál ba apoiu operasionál. “MEJD  tau-atensaun ba programa sira ne’e tanba hakarak atinje objetivu polítika edukativu” Vise-Ministru Edukasaun, Juventude no Desportu (VMEJD), João Zacarias hateten ba Agência TATOLI, iha Parlamentu Nasionál, ohin.

Orsamentu refere hasai husi pakote ka orsamentu tetu fiskál 2020 nian ho montante MEJD inklui SEJD ho montante hamutuk $96.975 no esklui SEJD hamutuk $89.511, ne’ebé sei defende husi Ministra Edukasaun, Juventude no Desportu (MEJD), Dulce de Jesus Soares.

Enkuantu, husi totál orsamentu sira ne’e alende ba bens no serbisu. Iha mós orsamentu ba saláriu no vensimentu, transferénsia públika, kapitál menór no kapitál dezenvolvimentu.

Orsamentu MEJD inklui SEJD ba saláriu no vensimentu ($61.217), transferénsia públika ($6.125), kapitál menór ($3.286) no kapitál dezenvolvimentu ($ 7.022).

Nune’e mós, orsamentu MEJD esklui SEJD ba saláriu no vensimentu ($60.608), transferénsia públika ($1.775), kapitál menór ($3.236) no kapitál dezenvolvimentu ($ 6.028).

Jornalista    : Tomé Amado

Editór          : Rafy Belo

1 KOMENTÁRIU

  1. tuir hau nia hanoin Orsamentu Bens no Servisu MEJD Sei Uza Ba Asegura deit intensaun hodi impede programa laos atu ba asegura fali programa tanba durante nee programa balun la realiza tan deit iha impedemetu iha Gabinete MEJD

HAKEREK NO HATÁN

Please enter your comment!
Please enter your name here