Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 16 janeiru 2020 (TATOLI)—Primeiru-Ministru (PM), Taur Matan Ruak, hateten oras ne’e Governu halo hela esforsu ba kontinuasaun polítika reforma fiskál.

“Governu esforsa hela halo reforma sira-ne’e para bele aumenta ita-nia reseita. Uluk ita iha Komisaun Reforma Fiskál ida, maibé sira-nia preparativu ramata no ita transfere ba Ministériu Finansa. Daudaun ne’e halo ezersísiu boot ida para kria kondisaun administrativa, téknika no legál nune’e bele aumenta ita-nia reseita oituan-oituan”, Primeiru-Ministru, Taur Matan Rauk, ko’alia asuntu ne’e hodi responde ba preokupasaun Deputadu Bankada FRETILIN, Fabião de Oliveira, iha debate jeneralidade OJE 2020 loron daruak, iha Parlamentu Nasionál, kinta ne’e.

Xefe Governu afirma, presiza iha kondisaun no rekursu umanu ne’ebé sufisiente hodi bele iha kapasidade rekolla reseita iha futuru.

Taur afirma, hafoin debate orsamenru 2020, Ministériu Finansa bele tau importánsia ba polítika ida-ne’e, tanba Timor-Leste kontinua dependénsia ba fundu mina-rai.

Nia dehan, bainhira Governu finaliza lejizlasaun kona-ba polítika reforma fiskál ne’e sei aprezenta ba Parlamentu Nasionál atu halo aprovasaun para bele ajuda Governu rekolla reseita iha futuru”, Primeiru-Ministru hateten.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here