Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 16 janeiru 2020, (TATOLI)–Bankada Congresso Nacional da Reconstrução de Timor (CNRT) liuhosi deputadu Domingos Carvalho no deputadu bankada KHUNTO, António Verdial husu Primeiru-Ministru, Taur Matan Ruak, bainhira loos mak hamosu remodelasaun.

“Primeiru-Ministru, remodelasaun ne’e bainhira mak hamosu? Remodelasaun ne’e mós hamosu la’ós iha de’it Governu maibé ita AMP tenke tuur hamutuk foin haree. Ita haree kle’ur demais ona remodelasaun ne’e,” deputadu ne’e kestiona iha nia intervensaun liuhusi diskusaun Orsamentu Jerál Estadu (OJE) 2020 iha Plenária Parlamentu Nasionál, kinta ne’e.

Nia argumenta, Governu daudaun ne’e besik ona ba tinan rua maibé kontinua la’o nafatin ho meza ain tolu no ida-ne’e sai hanesan preokupasaun boot ba CNRT.

“Ida-ne’e mak hosi ami. Favór boot ida, Primeiru-Ministru haree sériu asuntu ne’e,” nia deklara.

Entretantu, relasiona ho membru Governu nai’n-9 ne’ebé seidauk simu pose, nia husu ba Primeiru-Ministru atu halakon tiha ministériu hirak-ne’e hodi harii de’it diresaun.

“Membru Governu na’in-9 ne’ebé seidauk simu pose, Tribunál deklara ona katak ema sira-ne’e laiha sala. Nusá mak sira-ne’e pendente nafatin ne’e? Tanba saida? Se ministériu balun ne’e la merese atu tau ministru iha ne’ebá, di’ak liu halakon tiha ministériu sira-ne’e para tau de’it diresaun,” nia informa.

Iha sorin seluk, deputadu bankada Kmanek Haburas Unidade Nasionál Timor Oan (KHUNTO), António Verdial mós ezije ba Primeiru-Ministru atu buka meiu oinsá hodi kompleta lalais governasaun ne’ebé la’o hela ho ain tolu ne’e.

“Ha’u laiha hanoin ne’ebé ladi’ak ba governasaun ida-ne’e. Maibé, ha’u husu ba Primeiru-Ministru se bele kompleta lalais tiha membru Governu sira ne’ebé seidauk kompletu ne’e,” Verdial preokupa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here