Bandeira partidu CNRT. Foto espesiál.

DILI, 16 janeiru 2020 (TATOLI)—Deputadu Bankada Congresso Nacional da Reconstrução de Timor (CNRT), Domingos Carvalho, kontinua ezije ba Governu atu selu lalais projetu 143 ne’ebé Governu debe to’o ohin loron.

“Ita hatene katak projetu 143 ne’e iha Livru 3 A iha ne’ebá prevee hela nia orsamentu tanba saida mak labele selu no tanba saida mak la hamosu kontratu ba kompañia sira ne’ebé halo serbisu hotu ona para selu sira,” deputadu ne’e kestiona iha Parlamentu Nasionál liuhusi debate proposta Orsamentu Jerál Estadu (OJE) 2020, kinta ne’e.

Nia dehan Estadu bele debe kompañia maibé kompañia nunka debe Estadu sai to’o halo ki’ak kompañia sira.

“Kuitadu! Ita-nia kompañia sira fa’an sira-nia uma hotu. Kareta ema foti hotu tanba de’it Governu binga hela hodi la halo pagamentu ba sira,” nia realsa.

Tanba ne’e, Domingos tenik, hakarak ka lakohi Primeiru-Ministru tenke foti medida oinsá atu selu lalais kompañia hirak-ne’e.

“Governu fó projetu ba ita-nia emprezáriu sira, la’ós atu hamate fali ita-nia emprezáriu sira,” nia subliña.

Entretantu, Vise-Prezidente Parlamentu Nasionál, Maria Angelina Lopez Sarmento hateten informasaun ne’ebé deputadu sira asesu hosi Ministériu Obra Públika katak entre projetu 143 ne’e, projetu 98 maka iha ona kontratu, maibé projetu 44 maka seidauk iha kontratu. Hosi 44 projetu ne’ebé iha, ida mak halo amandamentu ba kontratu.

Oras ne’e, nia haktuir, Governu halo hela avaliasaun oinsá haree projetu sira-ne’e iha duni kualidade, prenxe duni rekezitu lei aprovizionamentu nian sira bele buka dalan oinsá atu solusiona projetu 44 ne’ebé laiha kontratu ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here